കണ്ണൂര്: പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തര മന്ത്രി അമിത് ഷായ്ക്കും കേരള സര്ക്കാര് ഔദ്യോഗികമായി സമ്മാനിക്കുന്ന ഓണക്കോടി കേരളത്തിന്റെ സ്വന്തം കൈത്തറി തുണികൊണ്ട്. കണ്ണൂര് ചൊവ്വയിലെ ലോക്നാഥ് കോ-ഓപ്പ് വീവിങ് സൊസൈറ്റിയാണ് ഓണക്കോടി ഒരുക്കുന്നത്. ഒരാഴ്ചയായി നെയ്ത്തുകാരി വാരത്തെ കെ. ബിന്ദു നെയ്യുന്ന തുണിയുടെ പ്രവൃത്തി പൂര്ത്തിയായി.
കോട്ടയം രാമപുരം അമനകര സ്വദേശിയും പാലക്കാട് കൊടുമ്പ് കൈത്തറി ക്ലസ്റ്ററിലെ ഡിസൈനറുമായ അഞ്ജു ജോസാണ് കുര്ത്ത തുന്നുന്നതിനുള്ള തുണിയുടെ നിറങ്ങളും പാറ്റേണും രൂപകല്പന ചെയ്തത്. ഇളംപച്ച, വെള്ള, റോസ്, ചന്ദനനിറം എന്നിവയോടൊപ്പം ഇളംതളിരിലയുടെ നിറംകൂടി ഒത്തുചേര്ന്ന് കുത്തനെ വരയോടു കൂടിയതാവും കുര്ത്ത. അതീവശ്രദ്ധയോടെയുള്ള നെയ്ത്തില് ദിവസം മൂന്നു മീറ്റര് തുണിയേ ഒരുക്കാന് സാധിക്കൂ.
ദേശീയ കൈത്തറി ദിനമായ നാളെ തുണി തിരുവനന്തപുരത്തെത്തിക്കും. ഹാന്ടെക്സിന്റെ തിരുവനന്തപുരത്തെ തുന്നല് കേന്ദ്രത്തിലാണ് കുര്ത്ത തയ്ച്ചെടുക്കുക. ഹാന്ഡ്ലൂം ആന്ഡ് ടെക്സ്റ്റൈല് സ്റ്റേറ്റ് ഡയറക്ടര് കെ.എസ്. അനില്കുമാറിന്റെ നിര്ദേശാനുസരണം ലോക്നാഥ് വിവേര്സ് സെക്രട്ടറി പി.വിനോദ് കുമാര് തുണി നിര്മിക്കുന്ന ദൗത്യം ഏറ്റെടുക്കുകയായിരുന്നു.
