ഗുരുവായൂര്: റെയില്വേ മേല്പ്പാല നിര്മ്മാണത്തിന്റെ അവസാനഘട്ട പ്രവൃത്തികള്ക്കാവശ്യമായ ഗര്ഡറുകളും അഡ്ജസ്റ്റ്മെന്റ് സ്പാനുകളും നിര്മ്മാണ സ്ഥലത്തെത്തി. തിരുച്ചിറപ്പളളി ഫാക്ടറിയില് നിന്നും ഗര്ഡറുകളും അഡ്ജസ്റ്റ്മെന്റ് സ്പാനുകളും എത്തിയതോടെ നിര്മാണ തടസങ്ങള് നീങ്ങി. മേല്പ്പാലം സെപ്റ്റംബര് മാസത്തോടെ പൂര്ത്തീകരിക്കാന് കഴിയും. ഗര്ഡറുകള് സ്ഥാപിക്കുന്നതിനു വേണ്ടി റെയില്വേ ക്രോസ് ശാശ്വതമായി അടയ്ക്കുന്നതിനു വേണ്ടി കലക്ടറില് നിന്നും എന്ഒസിയും ലഭ്യമായി.
മേല്പ്പാല നിര്മാണത്തിന്റെ ഭാഗമായി പാളത്തിനു മുകളിലുള്ള സ്ലാബ് കോണ്ക്രീറ്റിങ്ങ് ഒരു മാസം കൊണ്ട് പൂര്ത്തീകരിക്കും. നിര്മാണം പൂര്ത്തിയായ ഭാഗത്തെ കൈവരികളുടെ പണി പുരോഗമിക്കുകയാണ്. പാളത്തിനു മുകളിലെ ഭാഗത്ത് ഗര്ഡറുകള് സ്ഥാപിക്കുകയും പണി പൂര്ത്തിയായ ഭാഗവും തമ്മില് ബന്ധിപ്പിക്കുന്ന പ്രവൃത്തി ഉടന് ആരംഭിക്കും.
പാലത്തിനു മുകളിലുള്ള റോഡ് ടാറിങ്ങ് കൂടി പൂര്ത്തീകരിക്കുന്നതോടെ ദീര്ഘകാലത്തെ കാത്തിരിപ്പിന് വിരാമമാകും. സംസ്ഥാന സര്ക്കാരിന്റെ പൊതുമരാമത്ത് വകുപ്പിന് കീഴിലുള്ള ആര്ബിഡിസികെ യാണ് മേല്പ്പാല നിര്മാണ പ്രവൃത്തികള് നിര്വ്വഹിക്കുന്നത്.
