ചെറുതുരുത്തി: കാട്ടാനയെ കൊന്ന് കുഴിച്ച് മൂടിയ കേസിലെ അവസാന പ്രതിയും കീഴടങ്ങി. ആനയുടെ ജഡത്തില് നിന്നും മുറിച്ചെടുത്ത കൊമ്പ് കടത്താന് അഖിലിനെ സഹായിച്ച കാറിന്റെ ഉടമയും, ഡ്രൈവറുമായ എറണാകുളം പട്ടിമറ്റം സ്വദേശി, വെട്ടിക്കാട്ടുമാരി ഹൗസില് വി. അരുണ് ആണ് ഇന്നലെ മച്ചാട് റേഞ്ച് ഓഫീസര് മുമ്പാകെ കീഴടങ്ങിയത്. ഇതോടെ സംഭവത്തില് ഉള്പ്പെട്ട എല്ലാ പ്രതികളും അന്വേഷണ സംഘത്തിന്റെ കസ്റ്റഡിയിലായി.
മുള്ളൂര്ക്കര ഗ്രാമപഞ്ചായത്തിലെ വാഴക്കോടുള്ള മണിയഞ്ചിറ വീട്ടില് റോയ് ജോസഫിന്റെ റബ്ബര് എസ്റ്റേറ്റിനുള്ളില് വെച്ചാണ്, കഴിഞ്ഞ മാസം 14 ന് രാത്രി കാട്ടാന ഷോക്കേറ്റ് കൊല്ലപ്പെടുന്നത്. സംഭവം പുറത്തറിയാതിരിക്കാന് സ്ഥലമുടമയായ റോയ് കൂട്ടുകാരെ വിളിച്ചുവരുത്തി ആനയെ സംഭവസ്ഥലത്ത് തന്നെ കുഴിച്ച് മൂടുകയായിരുന്നു. സംഭവം നടന്ന് ആഴ്ചകള്ക്കുള്ളില് തന്നെ പ്രതികളെയെല്ലാം പിടികൂടാന് കഴിഞ്ഞത് അന്വേഷണ സംഘത്തിന്റെ മികവാണ് തെളിയിക്കുന്നത്. മച്ചാട് റെയ്ഞ്ച് ഓഫീസര് ശ്രീദേവി മധുസൂദനന്, വാഴാനി സ്റ്റേഷന് ഡെ. റെയിഞ്ച് ഫോറസ്റ്റ് ഓഫീസര് പി. വിനോദ്, സെക്ഷന് ഫോറസ്റ്റ് ഓഫീസര്മാരായ കെ.എസ്. സെബാസ്റ്റ്യന്, പി.ബി. ഹരിദാസ് എന്നിവരുടെ നേതൃത്വത്തിലുള്ള സംഘത്തിനാണ് അന്വേഷണ ചുമതല.
