തിരുവനന്തപുരം: പത്താം ജന്മദിനത്തിന് മുന്നോടിയായി ശബരിമലയില്‍ ദര്‍ശനം നടത്തി മാളികപ്പുറം സിനിമാ താരം ദേവനന്ദ. ഇനി സ്വാമിയെക്കാണാന്‍ 40 വര്‍ഷം കാത്തിരിക്കണമെന്നും ദേവനന്ദ കുറിച്ചു. ശബരിമലയില്‍ നിന്നുള്ളൊരു വീഡിയോയും ദേവനന്ദ തന്റെ ഇന്‍സ്റ്റഗ്രാമില്‍ പങ്കുവെച്ചു. സ്വാമിയെ കാണാനുള്ള കാത്തിരിപ്പ് എന്തിനേക്കാളും വലുതാണെന്ന് ഈ ദേവനന്ദ കുറിച്ചു.
‘ഇനി സ്വാമിയേ കാണാന്‍ 40 വര്‍ഷത്തെ കാത്തിരിപ്പാണ്, അതിലും വലുതല്ല മറ്റ് എന്തിന് വേണ്ടി ഉള്ള കാത്തിരിപ്പും, കഴിഞ്ഞ ദിവസം മലയില്‍ പോയി ഭഗവാനെ കണ്ടപ്പോള്‍’, ദേവനന്ദ കുറിച്ചു. അയ്യപ്പനെ ഏറെ ആരാധിക്കുന്ന ദേവനന്ദ 75 ദിവസം വ്രതമനുഷ്ഠിച്ചാണ് മാളികപ്പുറത്തില്‍ അഭിനയിച്ചത്.
മാളികപ്പുറം സിനിമയിലെ കല്ലു എന്ന കഥാപാത്രത്തെ സംസ്ഥാന ചലച്ചിത്ര പുരസ്‌കാര നിര്‍ണയത്തില്‍ തഴഞ്ഞെന്ന് അടുത്തിടെ ആരോപണം ഉയര്‍ന്നിരുന്നു. വിവാദങ്ങള്‍ക്കും വിമര്‍ശനങ്ങള്‍ക്കും വളരെ പക്വതയാര്‍ന്ന മറുപടിയായിരുന്നു ദേവനന്ദ നല്‍കിയത്. ജൂറിയുടെ തീരുമാനം അംഗീകരിക്കുന്നുവെന്നും ഒരുപാട് പേര്‍ മത്സരിക്കുമ്പോള്‍ ഒരാള്‍ക്കു മാത്രമാണ് അവാര്‍ഡ് ലഭിക്കുന്നതെന്നും ദേവനന്ദ വ്യക്തമാക്കിയിരുന്നു.
