എരുമപ്പെട്ടി: എരുമപ്പെട്ടിയില്‍ വളര്‍ത്തു കുതിരയെ മോഷ്ടിച്ചതായി പരാതി. കുതിരയെ കൊണ്ടുപോകുന്ന ദൃശ്യങ്ങള്‍ നിരീക്ഷണ ക്യാമറയില്‍ പതിഞ്ഞിട്ടുണ്ട്. പൊലീസ് കേസെടുത്ത് അന്വേഷണം ആരംഭിച്ചു.
എരുമപ്പെട്ടി ഉമിക്കുന്ന് കോളനിയില്‍ നെടുങ്ങാട്ടില്‍ സുലേഷിന്റെ റാണി എന്ന് പേരുള്ള പെണ്‍കുതിരയാണ് മോഷണം പോയത്. തിപ്പല്ലൂര്‍ ക്ഷേത്രത്തിന് സമീപം മേയാന്‍ വിട്ടതായിരുന്നു. ഇവിടെ നിന്നാണ് കുതിരയെ കൊണ്ടുപോയിരിക്കുന്നത്. കുതിരയെ കൊണ്ടുപോകുന്ന ദൃശ്യം റോഡരികിലെ വീട്ടില്‍ സ്ഥാപിച്ച നിരീക്ഷണ ക്യാമറയില്‍ പതിഞ്ഞിട്ടുണ്ട്. എന്നാല്‍ പാഴിയോട്ടുമുറി മുതല്‍ ദൃശ്യങ്ങള്‍ കാണുന്നില്ല. ഇവിടെ നിന്ന് വാഹനത്തില്‍ കയറ്റി കൊണ്ടുപോയിട്ടുണ്ടാകുമെന്നാണ് പൊലീസ് നിഗമനം.
ഇണക്കമുള്ള കുതിരയായതിനാല്‍ നാട്ടുകാര്‍ക്ക് പ്രിയപ്പെട്ടവളായിരുന്നു റാണി. എത്രയും പെട്ടെന്ന് കുതിരയെ കണ്ടെത്തുവാനുള്ള നടപടി പൊലീസ് കൈക്കൊള്ളണമെന്ന് ഉടമയും നാട്ടുകാരും ആവശ്യപ്പെട്ടു.
