ശ്രീനഗര്‍: ഭീകരവാദ പ്രവര്‍ത്തനങ്ങളുമായി ബന്ധപ്പെട്ട് ജമ്മു കശ്മീരിലെ അഞ്ചിടങ്ങളില്‍ എന്‍ഐഎ റെയ്ഡ്. പാകിസ്ഥാന്‍ പിന്തുണയുള്ള ഭീകരവാദ സംഘടനകളുടെ പുതിയ ശാഖകള്‍ മേഖലയില്‍ പ്രവര്‍ത്തിക്കുന്നുവെന്ന കണ്ടെത്തലിന്റെ അടിസ്ഥാനത്തിലാണ് റെയ്ഡ്. തെക്കന്‍ കശ്മീരിലെ അനന്ത്നാഗ്, ഷോപ്പിയാന്‍, പുല്‍വാമ ജില്ലകളിലാണ് അന്വേഷണ സംഘം തെരച്ചില്‍ നടത്തിയത്.
കശ്മീരില്‍ വ്യാപകമായി ആക്രമണങ്ങള്‍ നടത്താന്‍ ഭീകരര്‍ നേരിട്ടും ഓണ്‍ലൈനായും നടത്തിയ ഗൂഡാലോചനകളുടെ വിവരങ്ങള്‍ എന്‍ഐഎയ്‌ക്ക് ലഭിച്ചിരുന്നു. നിരവധി ഡിജിറ്റല്‍ ഉപകരണങ്ങള്‍ റെയ്ഡില്‍ പിടിച്ചെടുത്തിട്ടുണ്ട്. നിരോധിത ഭീകരവാദ സംഘടനകളായ ലഷ്‌കര്‍ ഇ തൊയ്ബ, ജയ്ഷ് ഇ മുഹമ്മദ്, ഹിസ്ബുള്‍ മുജാഹിദ്ദീന്‍, അല്‍ ബാദര്‍, അല്‍ ഖ്വയ്ദ തുടങ്ങിയവയുമായി ബന്ധമുള്ള പുതിയ ഭീകരസംഘങ്ങളാണ് കശ്മീരില്‍ പ്രവര്‍ത്തനമാരംഭിച്ചിരിക്കുന്നത്.
