തിരുവനന്തപുരം: സര്‍ക്കാര്‍ അവയവദാന പദ്ധതിക്കെതിരെ പരാമര്‍ശം നടത്തിയതിനെ തുടര്‍ന്ന് ഡോ. ഗണപതിക്ക് ഡയറക്ടര്‍ ഓഫ് മെഡിക്കല്‍ എഡ്യുക്കേഷന്‍ നോട്ടീസ് അയച്ചു. കൊച്ചിയിലെ സ്വകാര്യ ആശുപത്രിയില്‍ നടന്ന അവയവദാനത്തിനെതിരെയും ഒരു മതവിഭാഗത്തിനെതിരെയും നടത്തിയ പരാമര്‍ശങ്ങളിന്മേലാണ് നോട്ടീസ്. ആരോപണങ്ങളില്‍ ഡോ. ഗണപതി തെളിവ് ഹാജരാക്കണമെന്നാണ് ഡിഎംഒ ആവശ്യപ്പെട്ടത്.
സ്വകാര്യ ആശുപത്രിയിൽ നടന്ന മസ്തിഷ്‌ക മരണം സംഭവിച്ച രോഗിയുടെ അവയവങ്ങള്‍ ആശുപത്രി അധികൃതര്‍ വില്‍പ്പന നടത്തിയെന്ന് ആരോപിച്ച് നിയമ പോരാട്ടം നടത്തിയ വ്യക്തിയാണ് ഡോ. ഗണപതി. കഴിഞ്ഞ മാസം ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് അദ്ദേഹം വിവാദ പരാമര്‍ശം നടത്തിയത്. ഒരു മതവിഭാഗത്തിലുള്ള ഡോക്ടര്‍മാരും ബിസിനസുകാരും ഉടമസ്ഥരായിട്ടുള്ള ആശുപത്രികളിലാണ് ഏറ്റവും കൂടുതല്‍ മസ്തിഷ്‌ക മരണം സംഭവിക്കുന്നതെന്നാണ് ഡോ ഗണപതി പറഞ്ഞത്. എന്നാല്‍ ഈ മതവിഭാഗത്തിലുള്ളവരില്‍ വളരെ കുറവ് മസ്തിഷ്‌ക മരണം മാത്രമാണ് സംഭവിക്കുന്നതെന്നും അദ്ദേഹം പറഞ്ഞിരുന്നു.
അവയവദാനത്തിനെതിരെ ഡോ. ഗണപതി തെറ്റായ ആരോപണങ്ങള്‍ ഉന്നയിക്കുന്നതായി കേരള സ്‌റ്റേറ്റ് ഓര്‍ഗന്‍ ആന്‍ഡ് ടിഷ്യു ട്രാന്‍സ്പ്ലാന്റ് ഓര്‍ഗനൈസേഷന്‍ സര്‍ക്കാരിന്റെ ശ്രദ്ധയില്‍പ്പെടുത്തിയിരുന്നു. ഇതിനെ തുടര്‍ന്നാണ് നടപടി.
എന്നാല്‍, ഡോ. ഗണപതി നോട്ടീസിന് മറുപടി നല്‍കിയിട്ടില്ല. തൃപ്തികരമായ മറുപടി ലഭിക്കാത്തപക്ഷം തുടര്‍ നടപടികള്‍ സ്വീകരിക്കാനാണ് അധികൃതരുടെ തീരുമാനം. അവയവദാനത്തിനെതിരെ സമൂഹമാധ്യമങ്ങളില്‍ കുറിപ്പിട്ട വ്യക്തികള്‍ക്കെതിരെ നിയമ നടപടി സ്വീകരിക്കണമെന്ന് ആവശ്യപ്പെട്ട് ഡിജിപിയ്‌ക്ക് പരാതിയും നല്‍കിയിട്ടുണ്ട്.
പ്രതികരിക്കാൻ ഇവിടെ എഴുതുക: