തിരുവനന്തപുരം: വീട്ടുടമസ്ഥന്‍ കുടുംബസമേതം ക്ഷേത്രദര്‍ശനത്തിന് പോയ വേളയില്‍ വീട്ടില്‍ നിന്നും 100 പവന്‍ സ്വര്‍ണ്ണം മോഷണം പോയി. വിദേശത്ത് ജോലി ചെയ്യുന്ന തിരുവനന്തപുരം മണക്കാട് സ്വദേശിയായ രാമകൃഷ്ണന്റെ വീട്ടിലാണ് മോഷണം നടന്നത്.
100 പവൻ സ്വർണ്ണാഭരണങ്ങളാണ് മോഷ്ടാക്കള്‍ കവര്‍ന്നത്. മകന്റെ ഉപനയന ചടങ്ങിനോടനുബന്ധിച്ച് കഴിഞ്ഞ ദിവസം ലോക്കറിൽ സൂക്ഷിച്ചിരുന്ന 100 പവൻ സ്വർണം വീട്ടിലെത്തിച്ചിരുന്നു. ഇതിനെക്കുറിച്ച് ചിലര്‍ക്ക് അറിയാമെന്ന് പറയുന്നു. ക്ഷേത്രദർശനം കഴിഞ്ഞ് വെള്ളിയാഴ്ച രാവിലെ വീട്ടില്‍ മടങ്ങിയെത്തിയപ്പോഴാണ് മോഷണവിവരം അറിയുന്നത്.
രണ്ടാം നിലയിലെ കിടപ്പുമുറിയിലായിരുന്നു 100 പവൻ സ്വർണം സൂക്ഷിച്ചിരുന്നത്. ഇത് അറിയാവുന്നവര്‍ തന്നെയായിരിക്കാം മോഷ്ടാക്കള്‍ക്ക് നിര്‍ദേശം കൊടുത്തതെന്നും സംശയിക്കുന്നു. ഫോർട്ട് പൊലീസും വിരലടയാള വിദഗ്ധരും വീട്ടിൽ പരിശോധന നടത്തി.
