തൃശൂര്: മുകുന്ദപുരം താലൂക്കിലെ കല്ലൂര്, പുതുക്കാടിന് സമീപം ആമ്പല്ലൂര് എന്നീ പ്രദേശങ്ങളില് നേരിയ ഭൂചലനം. മുളയം, മണ്ണൂത്തി പ്രദേശങ്ങളിലും വലിയ രീതിയിലുള്ള മുഴക്കം അനുഭവപ്പെട്ടു. ഇന്ന് രാവിലെ 8.17നായിരുന്നു സംഭവം. കഴിഞ്ഞ രാത്രി മുതല് അതിശക്തമായ മഴ തുടരുന്നതിനിടെയാണ് ഭൂമിക്ക് വിറയലും തുടര്ന്നു മുഴക്കവും അനുഭവപ്പെട്ടത്.
ഭൂമിക്കടിയില് നിന്നും വലിയ മുഴക്കം കേട്ടതായും നാട്ടുകാര് പറഞ്ഞു. നാട്ടുകാര് വിവരം ജില്ലാ ഭരണകൂടത്തെ അറിയിച്ചു. ജില്ലാ കളക്ടര് വി.ആര്. കൃഷ്ണതേജ പ്രദേശം സന്ദര്ശിക്കും. ഭൂചലനത്തിൽ ആളപായമില്ല. മറ്റ് കേടുപാടുകൾ ഒന്നും തന്നെ സംഭവിച്ചിട്ടില്ല. ഭൂമിക്കടിയിൽ നിന്ന് മുഴക്കം കേൾക്കുന്നതിന്റെ കാരണം ഇതുവരെ വ്യക്തമായിട്ടില്ല.
നേരത്തെയും സമാനമായ സംഭവം ഉണ്ടായിട്ടുണ്ട്. 2018 ൽ തൃശൂർ, ഒല്ലൂർ, ലാല്ലൂർ, കണ്ണൻകുളങ്ങര, കൂർക്കഞ്ചേരി അടക്കമുള്ള പ്രദേശങ്ങളിൽ ഭൂചലനം അനുഭവപ്പെട്ടിരുന്നു.
