കൊല്ലങ്കോട്: പല്ലശ്ശനയില് ദമ്പതിമാരുടെ തല കൂട്ടിമുട്ടിച്ച സംഭവത്തില് വനിതാകമ്മീഷന് കേസെടുത്തു. അന്വേഷിച്ച് ഉടന് റിപ്പോര്ട്ട് നല്കാന് കൊല്ലങ്കോട് പോലീസിന് നിര്ദ്ദേശം നല്കി. വാര്ത്തകളുടെ അടിസ്ഥാനത്തില് കമ്മീഷന് സ്വമേധയാ കേസെടുക്കുകയായിരുന്നു.
പല്ലശ്ശന സ്വദേശിയായ സച്ചിന്റെയും കോഴിക്കോട് മുക്കം സ്വദേശിയായ സജ്ലയുടെയും വിവാഹ ശേഷം ഗൃഹപ്രവേശ സമയത്തായിരുന്നു സംഭവം. ദമ്പതികളുടെതലകള് കൂട്ടിമുട്ടിച്ചത് പിന്നില് നിന്ന അയല്വാസിയായിരുന്നു. അപ്രതീക്ഷിതമായിരുന്നതിനാല് വധുവും വരനും പകച്ചുപോയി. കടുത്ത വേദനയില് വധു കരഞ്ഞുകൊണ്ടാണ് വരന്റെ വീട്ടിലേക്ക് കയറിയത്. ഇതിന്റെ വീഡിയോ സോഷ്യല് മീഡിയയില് വൈറലായതിനെ തുടര്ന്ന് രൂക്ഷമായ വിമര്ശനമാണുയര്ന്നത്. തന്റെ നാട്ടില് ഇത്തരമൊരു ആചാരം ഇല്ലെന്നാണ് സച്ചിന് പ്രതികരിച്ചത്. അപ്രതീക്ഷിതമായതിനാല് പകച്ചുപോയെന്നും അല്ലെങ്കില് താന് തന്നെ കൃത്യം ചെയ്തയാള്ക്ക് മറുപടി കൊടുത്തേനെയെന്നും സജ്ല മാദ്ധ്യമങ്ങളോട് പ്രതികരിച്ചിരുന്നു.” വീട്ടുകാരില് നിന്ന് വിട്ട് വിവാഹത്തിന്റെ ടെന്ഷനുമായി നില്ക്കുമ്പോഴായിരുന്നു ആഘാതം. തല കൂട്ടിയിടിച്ചതോടെ വേദനയാല് എവിടെയാണ് നില്ക്കുന്നതെന്ന് പോലും അറിയാതെ അല്പനേരം സ്തംഭിച്ചു പോയെന്നും യുവതി പറഞ്ഞു.
