ഷൊര്ണൂര്: കാസര്കോട് – തിരുവനന്തപുരം വന്ദേഭാരത് ട്രെയിനിന്റെ ശുചിമുറിയില് കയറിയ യുവാവ് മണിക്കൂറുകളോളം വാതില് തുറക്കാന് കൂട്ടാക്കാതെയിരുന്നത് യാത്രക്കാരെയും റെയില്വെ ജീവനക്കാരെയും ആശങ്കയിലാക്കി. മഹാരാഷ്ട്ര ഛത്രപതി സ്വദേശി എന്നുപറയുന്ന ചരണ് നാരായണന് (26) ആണ് ഇന്നലെ ‘ശുചിമുറി നാടകം’ നടത്തിയത്.
ടിക്കറ്റെടുക്കാതെ കാസര്കോട് സ്റ്റേഷനില് നിന്ന് ട്രെയിനില് ഓടിക്കയറിയ യുവാവ് പിന്നീട് ശുചിമുറിയില് കയറി വാതില് അടച്ചിരിക്കുകയായിരുന്നു. ഏറെനേരം കഴിഞ്ഞിട്ടും ഇയാള് ടോയ്ലറ്റില് നിന്ന് പുറത്തിറങ്ങാതിരുന്നത് ശ്രദ്ധിച്ച യാത്രക്കാര് റെയില്വെ ജീവനക്കാരെ വിവരം അറിയിച്ചു. അകത്തുനിന്ന് പൂട്ടിയ ഡോറിന്റെ ലോക്ക് തുറക്കാനാവാതെ യുവാവ് കുടുങ്ങി എന്നാണ് ആദ്യം ധരിച്ചത്. സംഭവം നടന്ന് മണിക്കൂറുകള് പിന്നിട്ടപ്പോള് ഇയാള് ആത്മഹത്യ ചെയ്തിരിക്കുമോ എന്ന നിലയിലേക്ക് ആശങ്ക വളര്ന്നു. യാത്രക്കാരും ട്രെയിനിലെ ജീവനക്കാരും ആര്പിഎഫ് – ആര്പി ഉദ്യോഗസ്ഥരും അനുനയത്തില് ഇടപെട്ടിട്ടും ഇയാള് വാതില് തുറക്കാന് കൂട്ടാക്കിയില്ല.
ഡോര് ഉള്ളില് നിന്ന് പൂട്ടിയതിന് പുറമെ ഇയാള് കയറിട്ട് കെട്ടുകയും ചെയ്തു. ഇയാളെ പുറത്തിറക്കാന് കണ്ണൂര്, കോഴിക്കോട് റെയില്വെ സ്റ്റേഷനുകളില് നടത്തിയ ശ്രമം വിജയിച്ചില്ല. ഒടുവില് വന്ദേഭാരത് വൈകിട്ട് 5.25ന് ഷൊര്ണൂര് റെയില്വെ സ്റ്റേഷനില് എത്തിയപ്പോള് കാത്തുനിന്ന റെയില്വെ സംരക്ഷണസേന, റെയില്വെ പോലീസ്, റെയില്വെ സാങ്കേതിക വിഭാഗം ജീവനക്കാര് എന്നിവര് ചേര്ന്ന് ശുചിമുറിയുടെ വാതില് കുത്തിപ്പൊളിച്ച് യുവാവിനെ പുറത്തിറക്കി. 15 മിനുറ്റോളം ട്രെയിന് ഇവിടെ നിര്ത്തിയിടേണ്ടി വന്നു. ഇയാളെ വിശദമായി ചോദ്യം ചെയ്ത് വ്യക്തത വരുത്തുമെന്ന് ആര്പിഎഫ് അസി. കമാന്ഡന്റ് ഷാജു പ്രഭാകര് പറഞ്ഞു.
