മുംബൈ: ഇന്ത്യന്‍ സൂപ്പര്‍ ലീഗി(ഐഎസ്എല്‍)ല്‍ മദ്ധ്യനിരതാരം വിനിത് റായിയെ മുംബൈ സിറ്റി എഫ്‌സി സ്വന്തമാക്കി. വരും സീസണിലേക്കാണ് നിലവില്‍ ഒഡീഷ എഫ്‌സി നായകനായ വിനിതിനെ മുംബൈ സ്വന്തമാക്കിയിരിക്കുന്നത്. ഇന്നലെയാണ് ക്ലബ്ബ് ഇക്കാര്യം ഔദ്യോഗികമായി അറിയിച്ചത്.
നിലവില്‍ ലോണ്‍ അടിസ്ഥാനത്തില്‍ ഐലാന്‍ഡേഴ്‌സ് ക്ലബ്ബിന് വേണ്ടിയാണ് വിനിത് റായി കളിക്കുന്നത്. കഴിഞ്ഞ വര്‍ഷം ജനുവരിയിലാണ് ഒഡീഷയില്‍ നിന്നും താരം ലോണ്‍ അടിസ്ഥാനത്തില്‍ ഐലാന്‍ഡേഴ്‌സിലെത്തിയത്. കഴിഞ്ഞ വര്‍ഷത്തെ എഎഫ്‌സി ചാമ്പ്യന്‍ഷിപ്പിലടക്കം 14 മത്സരങ്ങളില്‍ വിനിത് റായ് ഒഡീഷയ്‌ക്കുവേണ്ടി കളിച്ചിട്ടുണ്ട്.
വരും സീസണില്‍ മുംബൈ സിറ്റിക്കുവേണ്ടി കളിക്കുന്നതില്‍ താന്‍ ആവേശത്തിലാണെന്ന് വിനിത് റായ് അറിയിച്ചു. 2016 മുതല്‍ ഐഎസ്എലിന്റെ ഭാഗമായ വിനിത് റായ് കേരള ബ്ലാസ്‌റ്റേഴ്‌സ് അടക്കമുള്ള ടീമുകളില്‍ കളിച്ചിട്ടുണ്ട്. ഡെല്‍ഹി ഡൈനാമോസ് താരവുമായിരുന്നു.
