പത്തനംതിട്ട: മോഷ്ടിച്ച സ്‌കൂട്ടറില്‍ ഹെല്‍മറ്റില്ലാതെ കറങ്ങിയ കള്ളനെ എഐ ക്യാമറ ചതിച്ചു. മോഷ്ടാവിന്റെ ചിത്രം സഹിതം വാഹന ഉടമയ്ക്ക് സന്ദേശം ലഭിച്ചു. ഇതോടെ, പൊലീസ് നടത്തിയ അന്വേഷണത്തിലാണ് കള്ളനെ കയ്യോടെ പൊക്കിയത്. മോഷണവുമായി ബന്ധപ്പെട്ട് തടവുശിക്ഷ കഴിഞ്ഞ് പുറത്തുവന്ന സെബാസ്റ്റ്യനെ (ബിജു -53) കീഴ്വായ്‌പൂര് പൊലീസാണ് അറസ്റ്റു ചെയ്തു. നിരവധി കേസുകളില്‍ പ്രതിയാണ് ഇയാള്‍.ഒരുകോടി രൂപ വിലമതിക്കുന്ന പഞ്ചലോഹ വിഗ്രഹമുള്‍പ്പടെയുള്ളവ മോഷ്ടിച്ച കേസുകളില്‍ പ്രതിയായി ജയില്‍ശിക്ഷ അനുഭവിച്ചശേഷം 2023 മെയ് 25-നാണ് ഇയാള്‍ മോചിതനായത്. പുറത്തിറങ്ങിയതിനു പിന്നാലെ മോഷണം പതിവാക്കുകയായിരുന്നു. 26-ന് മോട്ടോര്‍ സൈക്കിളും 27-ന് കാറും മോഷ്ടിച്ചു. 28-രാത്രിയില്‍ മല്ലപ്പള്ളി ജി.എം.എം. ആശുപത്രിയിലെ ഫാര്‍മസിസ്റ്റിന്റെ രണ്ടുപവന്‍വരുന്ന സ്വര്‍ണമാല കവര്‍ന്നു.
ദൃശ്യങ്ങള്‍ സി.സി.ടി.വി. ക്യാമറയില്‍നിന്ന് ലഭിച്ചു. അന്നുതന്നെ മല്ലപ്പള്ളി ചാലുങ്കല്‍ ഭാഗത്ത് വീട് കുത്തിത്തുറന്ന് മോഷണ ശ്രമം നടത്തി. ഏറ്റുമാനൂരില്‍നിന്ന് മോട്ടോര്‍സൈക്കിള്‍ മോഷ്ടിച്ചു. അന്ന് രാത്രി മല്ലപ്പള്ളി ടൗണിന് സമീപം ആനിക്കാട് റോഡില്‍ കെ.മാര്‍ട്ട് എന്ന കടയില്‍നിന്ന് 31,500 രൂപയും ഒരു സ്‌കൂട്ടറും മോഷ്ടിച്ചു. ഈ സ്‌കൂട്ടറില്‍ ഹെല്‍മറ്റില്ലാതെ സഞ്ചരിച്ചതാണ് ഇയാളെ കുടുക്കിയത്. തിരുവനന്തപുരത്ത് പാങ്ങോട് ഹെല്‍മെറ്റ് വെക്കാതെ ഇയാള്‍ ഈ സ്‌കൂട്ടര്‍ ഓടിക്കുന്ന ചിത്രം സഹിതം ഉടമയുടെ ഫോണില്‍ പിഴ അടയ്‌ക്കാന്‍ അറിയിപ്പെത്തുകയായിരുന്നു. തുടര്‍ന്ന് വണ്ടി മോഷണം പോയവിവരം പൊലീസില്‍ അറിയിക്കുകയായിരുന്നു. അന്‍പതിലധികം മോഷണക്കേസുകളില്‍ പ്രതിയാണ് ഇയാള്‍
