ആലപ്പുഴ: എക്‌സല്‍ ഗ്ലാസ് അടക്കമുള്ള വ്യവസായ സ്ഥാപനങ്ങളും കയര്‍ ഫാക്ടറികളും ഇല്ലാതാക്കി ജില്ലയെ ശവപറമ്പാക്കി മാറ്റിയത് എല്ഡിഎഫ് സര്‍ക്കാര്‍ ആണെന്ന് ബിജെപി ജില്ലാ സെക്രട്ടറി ജി. വിനോദ് കുമാര്‍ പറഞ്ഞു. കിഴക്കിന്റെ വെനീസിനെ കിഴക്കിന്റെ വെണ്ണീറാക്കാന്‍ സാധിച്ചു എന്നതാണ് ഇടതു-വലതു ഭരണം കൊണ്ട് ജില്ലയ്‌ക്കുണ്ടായ നേട്ടം.
കേരളത്തിന് ഏറ്റവും കൂടുതല്‍ കേന്ദ്ര ആനുകൂല്യങ്ങള്‍ കിട്ടിയത് കഴിഞ്ഞ ഒന്‍പതു വര്‍ഷത്തിനുള്ളില്‍ ആണെന്നും, എന്നാല്‍ ജനങ്ങളില്‍ അത് പൂര്‍ണ്ണമായി എത്തിക്കുവാന്‍ നമുക്ക് സാധിച്ചിട്ടില്ല എന്നും അതുകൊണ്ട് നരേന്ദ്ര മോദി സര്‍ക്കാരിന്റെ ഭരണ നേട്ടങ്ങള്‍ ജനങ്ങളില്‍ എത്തിക്കാന്‍ എല്ലാ മോര്‍ച്ച ഭാരവാഹികളും മുന്നിട്ടിറങ്ങണം എന്നും അദ്ദേഹം പറഞ്ഞു. അമ്പലപ്പുഴ നിയോജക മണ്ഡലത്തിലെ മോര്‍ച്ചകളുടെ സംയുക്ത നേതൃ സമ്മേളനം ഉത്ഘാടനം ചെയ്തു സംസാരിക്കുകയായിരുന്നു അദ്ദേഹം.
മുല്ലയ്‌ക്കല്‍ മണ്ഡലം പ്രസിഡന്റ് കണ്ണന്‍ തിരുവമ്പാടി അധ്യക്ഷത വഹിച്ചു. സംയുക്ത മോര്‍ച്ച ഇന്‍ചാര്‍ജും ജില്ലാ സെല്‍ കോഡിനേറ്ററുമായ അഡ്വ.കെ. വി. ഗണേഷ് കുമാര്‍, സംസ്ഥാന കൗണ്‍സില്‍ അംഗവും അമ്പലപ്പുഴ പ്രഭാരിയുമായ ആര്‍. ഉണ്ണികൃഷ്ണന്‍, അമ്പലപ്പുഴ മണ്ഡലം പ്രസിഡന്റ് വി.ബാബുരാജ്, ന്യൂനപക്ഷ മോര്‍ച്ച മുല്ലയ്‌ക്കല്‍ മണ്ഡലം പ്രസിഡന്റ് ജോസഫ് തറയക്കാട്ടില്‍ എന്നിവര്‍ സംസാരിച്ചു.
