വടക്കഞ്ചേരി: പാലക്കാട് വടക്കഞ്ചേരി ആയക്കാടിന് സമീപം സ്ഥാപിച്ച എ ഐ ക്യാമറ വാഹനമിടിച്ച് തകര്ത്ത നിലയില്. ആയക്കാട് മന്ദിന് സമീപം സ്ഥാപിച്ച ക്യാമറയാണ് വ്യാഴാഴ്ച രാത്രി 11 മണിയോടെ വാഹനമിടിച്ച് തകര്ത്തത്. ഇന്നോവ കാര് ബോധപൂര്വ്വം പുറകോട്ടെടുത്ത് ക്യാമറ സ്ഥാപിച്ച തൂണില് ഇടിച്ച് വീഴ്ത്തുകയായിരുന്നു.
ശബ്ദം കേട്ട സമീപവാസികള് പോലീസില് വിവരമറിയിക്കുകയായിരുന്നു. പൊലീസും മോട്ടോര് വാഹന വകുപ്പും നടത്തിയ പരിശോധനയില് ബോധപൂര്വ്വം ഇടിച്ച് തകര്ത്തതാണെന്ന് വ്യക്തമായിട്ടുണ്ട്. കാറിന്റെ പുറക് വശത്തെ ചില്ല് പൊട്ടിയ നിലയിലാണ്. ചില്ലില് സിദ്ധാര്ത്ഥ് എന്ന് ഇംഗ്ലീഷില് എഴുതിയിട്ടുള്ളതായി പരിശോധനയില് കണ്ടെത്തി.
വടക്കഞ്ചേരി സിഐ കെ.പി. ബെന്നി, എസ്ഐ ജീഷ്മോന് വര്ഗ്ഗീസ്, ആലത്തൂര് ജോയിന്റ് ആര്ടിഒ സന്തോഷ്കുമാര്, എന്ഫോഴ്സ്മെന്റ് എഎംവി ഐ.കെ. ദേവീദാസന്, സയന്റിഫിക് അസിസ്റ്റന്റ് കെ. അനുപമ എന്നിവരുടെ നേതൃത്വത്തിലുള്ള സംഘം സ്ഥലത്ത് പരിശോധന നടത്തി. ക്യാമറയുടെ കേടുപാടുകള് പരിഹരിച്ച് ഉടന് തന്നെ പുനസ്ഥാപിക്കുമെന്ന് മോട്ടോര് വാഹന വകുപ്പ് അധികൃതര് അറിയിച്ചു.
