ഹൈദരാബാദ്: ദല്ഹിയിലെ ശ്രദ്ധ വാല്ക്കര് കൊലപാതകത്തിന് സമാനമായി ഹൈദരാബാദില് നഴ്സിനെ കൊന്ന് കഷ്ണങ്ങളാക്കി ഫ്രിഡ്ജില് സൂക്ഷിച്ചു. ഹൈദരാബാദിലെ സ്വകാര്യ ആശുപത്രിയില് നഴ്സായ യെറാം അനുരാധ റെഡ്ഡിയാണ് (55) മരിച്ചത്. സംഭവത്തില് ഇവര് വാടകയ്ക്ക് താമസിച്ച വീടിന്റെ ഉടമ ചന്ദ്ര മോഹനെ (48) പോലീസ് അറസ്റ്റു ചെയ്തു.
മോസി നദിയുടെ തീരത്തു നിന്ന് രണ്ടാഴ്ച പഴക്കമുള്ള, സ്ത്രീയുടെ ശിരസ് കണ്ടു കിട്ടിയതിനെ തുടര്ന്നാണ് കൊലപാതകം പുറംലോകമറിയുന്നത്. ചന്ദ്ര മോഹന് അനുരാധയെ കുത്തിക്കൊന്ന ശേഷം ആറുകഷ്ണമാക്കി ഫ്രിഡ്ജില് സൂക്ഷിക്കുകയായിരുന്നു. ഘട്ടം ഘട്ടമായി ഇവ ഉപേക്ഷിക്കാനായിരുന്നു പദ്ധതി. ഫ്രിഡ്ജില് നിന്ന് ദുര്ഗന്ധം വമിക്കുന്നതറിയാതിരിക്കാന് ഇയാള് നിരന്തരം റൂം ഫ്രഷ്നറും മറ്റും ഉപയോഗിച്ചിരുന്നതായും പോലീസ് അറിയിച്ചു.
കുറേ കാലമായി അനുരാധ ചന്ദ്ര മോഹന്റെ വീട്ടിലായിരുന്നു വാടകയ്ക്ക് താമസിച്ചിരുന്നത്. 2018 മുതല് പലപ്പോഴായി ചന്ദ്ര മോഹന് അനുരാധയുടെ കൈയില് നിന്ന് ഏഴ് ലക്ഷം രൂപ കടം വാങ്ങി. അത് സ്റ്റോക്ക് എക്സ്ചേഞ്ചില് നിക്ഷേപിച്ചു. കൊവിഡായതോടെ പണം നഷ്ടമായി. കടം വാങ്ങിയ തുക അനുരാധയ്ക്ക് മടക്കി നല്കാന് കഴിഞ്ഞില്ല. അടുത്തിടെയായി അനുരാധ നിരന്തരം പണം ആവശ്യപ്പെട്ടു. തുടര്ന്ന് അനുരാധയെ കൊല്ലാന് ഇയാള് പദ്ധതി തയാറാക്കുകയായിരുന്നു.
അനുരാധയുടെ വീട്ടില് നടത്തിയ തെരച്ചിലില് ഫ്രിഡ്ജില് നിന്ന് അവരുടെ മൃതദേഹ ഭാഗങ്ങള് കണ്ടെത്തി. വലിയതോതില് റൂം ഫ്രഷ്നറുകളും വീട് ശുചിയാക്കാനുള്ള ഫിനോയില് പോലുള്ള ലോഷനുകളും അവിടെ സൂക്ഷിച്ചിരുന്നു. കൂടാതെ അനുരാധയെ കൊല്ലാനുപയോഗിച്ച കത്തി, കല്ല് പൊട്ടിക്കുന്ന രണ്ട് കട്ടറുകള് തുടങ്ങിയവയും കണ്ടെടുത്തു.
തല വേര്പെടുത്തിയ നിലയിലുള്ള ഉടല് ഉപേക്ഷിക്കാനായി പോളിത്തീന് കവറില് പൊതിഞ്ഞ് സൂക്ഷിച്ചിരിക്കുകയായിരുന്നു. കൊല ചെയ്യുന്ന രീതിയെക്കുറിച്ചും അതിനുപയോഗിക്കുന്ന ആയുധങ്ങളെക്കുറിച്ചും ചന്ദ്ര മോഹന് ഗൂഗിളില് തെരഞ്ഞിരുന്നതായും പോലീസ് വ്യക്തമാക്കി. ഒപ്പം താമസിച്ചിരുന്ന അമ്മയ്ക്കോ അയല്ക്കാര്ക്കോ യാതൊരു സംശയവും തോന്നാത്ത വിധത്തിലായിരുന്നു മോഹന്റെ പെരുമാറ്റം. കൂടാതെ അനുരാധ ജീവിച്ചിരിപ്പുണ്ടെന്ന് മറ്റുള്ളവരെ ബോധ്യപ്പെടുത്താനായി അവരുടെ ഫോണില് നിന്ന് ചന്ദ്ര മോഹന് മറ്റുള്ളവര്ക്ക് സന്ദേശങ്ങളയക്കാറുണ്ടായിരുന്നുവെന്നും പോലീസ് അറിയിച്ചു.
ജന്മഭൂമി ഓണ്ലൈന്