ന്യൂദല്ഹി : ലോകം വലിയ പ്രതീക്ഷയോടെയാണ് ഇന്ന് ഇന്ത്യയെ വീക്ഷിക്കുന്നതെന്ന് പ്രധാനമന്ത്രി നരേന്ദ്രമോദി . സമ്പദ്വ്യവസ്ഥയെ ശക്തിപ്പെടുത്തുന്നതിലും ദാരിദ്ര്യത്തിനെതിരെ പോരാടുന്നതിലും കോവിഡ്-19 മഹാമാരിക്കെതിരെ പോരാടുന്നതിലും ഇന്ത്യ ശ്രദ്ധേയമായ പുരോഗതി കൈവരിച്ചിട്ടുണ്ടെന്നും അദ്ദേഹം പറഞ്ഞു. ഇന്ത്യ കാണാനും ഇന്ത്യയുടെ അന്തസത്ത മനസിലാക്കാനും ലോകമെമ്പാടുമുള്ള ആളുകള് ഇന്ത്യയിലേക്ക് വരാന് ആഗ്രഹിക്കുന്നുവെന്നും അത്തരമൊരു സാഹചര്യത്തില് ഉത്തരാഖണ്ഡ് പോലുള്ള സംസ്ഥാനങ്ങള്ക്ക് മികച്ച അവസരങ്ങളുണ്ടെന്നും പ്രധാനമന്ത്രി പറഞ്ഞു.
ഡെറാഡൂണില് നിന്ന് ദല്ഹിയിലേക്കുള്ള വന്ദേ ഭാരത് എക്സ്പ്രസിന് പച്ചക്കൊടി കാട്ടി സംസാരിക്കുകയായിരുന്നു നരേന്ദ്ര മോദി . വീഡിയോ കോണ്ഫറന്സിലൂടെയായിരുന്നു പരിപാടി. ഉത്തരാഖണ്ഡില് ആദ്യമായി അവതരിപ്പിച്ച വന്ദേഭാരത് എക്സ്പ്രസ് ആണിത്. സുഖപ്രദമായ യാത്രാനുഭവം നല്കുന്ന ട്രെയിന് നൂതന സാങ്കേതികവിദ്യ ഉള്പ്പെടെയുള്ള സുരക്ഷാ സംവിധാനങ്ങളോടെയാണ് തദ്ദേശീയമായി നിര്മ്മിച്ചിരിക്കുന്നത്.
ലോകമെമ്പാടും നിന്ന് ആളുകള് ഇന്ത്യയിലേക്ക് വരാന് ആഗ്രഹിക്കുന്ന പശ്ചാത്തലത്തില് അവസരം പരമാവധി പ്രയോജനപ്പെടുത്താന് വന്ദേ ഭാരത് ട്രെയിനും ഉത്തരാഖണ്ഡിനെ സഹായിക്കുമെന്ന് പ്രധാനമന്ത്രി പറഞ്ഞു. 12,000 കോടി രൂപ ചെലവില് ചാര് ധാം ഗ്രാന്ഡ് പദ്ധതിയുടെ പ്രവര്ത്തനങ്ങള് അതിവേഗം പുരോഗമിക്കുകയാണെന്ന് മോദി പറഞ്ഞു. ദല്ഹി-ഡെറാഡൂണ് എക്സ്പ്രസ് വേ പൂര്ത്തിയാകുന്നതോടെ ഡെറാഡൂണ്-ദല്ഹി യാത്ര എളുപ്പമാകുമെന്നും അദ്ദേഹം പറഞ്ഞു. വരും ദിവസങ്ങളില് ദേവഭൂമി ഉത്തരാഖണ്ഡ് ലോകത്തിന്റെ മുഴുവന് ആത്മീയ ബോധത്തിന്റെയും ആകര്ഷണ കേന്ദ്രമായി മാറുമെന്നും ഭാവിയിലെ ആവശ്യങ്ങള്ക്കനുസരിച്ച് നാം അതിന്റെ വികസനം രൂപപ്പെടുത്തണമെന്നും പ്രധാനമന്ത്രി പറഞ്ഞു.
2014 മുതല് സര്ക്കാര് ഇന്ത്യന് റെയില്വേയെ മാറ്റിമറിച്ചിട്ടുണ്ടെന്നും പ്രധാനമന്ത്രി പറഞ്ഞു. അതിവേഗ ട്രെയിനുകള് എന്ന സ്വപ്നം ഇപ്പോള് യാഥാര്ത്ഥ്യമായി. 2014-ന് മുമ്പുള്ള 600 കിലോമീറ്ററിനെ അപേക്ഷിച്ച് ആറായിരം കിലോമീറ്റര് റെയില്വേ ലൈനുകള് ഓരോ വര്ഷവും വൈദ്യുതീകരിക്കപ്പെടുന്നുവെന്ന് അദ്ദേഹം പറഞ്ഞു. വന്ദേ ഭാരതത്തിന് സമാന്തരമായ വേഗതയില് അത് മുന്നോട്ട് പോകും . ഉത്തരാഖണ്ഡില് പുതുതായി വൈദ്യുതീകരിച്ച റെയില് പാതയുടെ ഭാഗങ്ങളും പ്രധാനമന്ത്രി സമര്പ്പിച്ചു. ഇതോടെ സംസ്ഥാനത്തെ മുഴുവന് റെയില്വേ റൂട്ടും 100 ശതമാനവും വൈദ്യുതീകരിച്ചു
