തൃശൂർ: തൃശൂർ പൂരത്തിന് വടക്കുന്നാഥക്ഷേത്രത്തിന്റെ തെക്കേ ഗോപുരത്തിൽ മാംസഭക്ഷണം വിളമ്പിയെന്ന ഗുരുതര ആരോപണവുമായി ഭക്തർ. ഭക്ഷണാവശിഷ്ടങ്ങളുംഡിസ്‌പോസിബിൾ പാത്രങ്ങളും തെക്കേഗോപുരത്തില്‍ ഉപേക്ഷിച്ച് നിലയിൽ കണ്ടെത്തിയതായി പറയുന്നു. ഹോട്ടലുകളിൽ ഭക്ഷണം വിതരണം ചെയ്യാൻ ഉപയോഗിക്കുന്ന കണ്ടെയ്നറുകളും ഒഴിഞ്ഞ വെള്ളക്കുപ്പികളും ക്ഷേത്രഗോപുരത്തിന് സമീപത്ത് നിന്നും കണ്ടെത്തിയെന്ന് പരാതിക്കാര്‍ പറയുന്നു.
തൃശൂർ സ്വദേശി കെ നാരായണൻകുട്ടി ചിത്രങ്ങൾ സഹിതം കൊച്ചിൻ ദേവസ്വം ബോർഡ് സെക്രട്ടറിക്കും ഓംബുഡ്‌സ്മാനും പരാതി നൽകിയിട്ടുണ്ട്. ക്ഷേത്ര ഉപദേശക സമിതി ഭാരവാഹികൾ ക്ഷേത്രത്തിനകത്ത് പാദരക്ഷ ഉപയോഗിച്ചതുള്‍പ്പെടെ പൂരദിവസം നിരവധി ആചാര ലംഘനങ്ങൾ നടന്നതായും ആരോപണമുണ്ട്. തെളിവായി ഇതിന്റെ ചിത്രങ്ങള്‍ ഉണ്ടെന്ന് അവകാശപ്പെടുന്നു. .
വടക്കുംനാഥ ക്ഷേത്രത്തിലെ നാല് ഗോപുരങ്ങള്‍ ജീർണ്ണാവസ്ഥയിലായതിനാല്‍ അവിടേക്ക് കയറുന്നതിന് വിലക്കുണ്ട്. എന്നാൽ വിലക്കുകൾ ലംഘിച്ച് 50 ലധികം പേരാണ് ഗോപുരത്തിൽ കയറിയത്. ദേവസ്വം തൃശൂർ അസി. കമ്മീഷണർ, ലോ കമ്മീഷണർ തുടങ്ങിയവര്‍ വിലക്കിയിട്ടും കയറുകയായിരുന്നു. ഒടുവിൽ കലക്ടറുടെ നേതൃത്വത്തിലുള്ള ദുരന്തനിവാരണ സേന ഉദ്യോഗസ്ഥരെത്തിയാണ് ഇവരെ താഴേക്ക് ഇറക്കിയത്.
വടക്കുന്നാഥ ക്ഷേത്രം പൈതൃക മന്ദിരമായതിനാൽ കേന്ദ്ര പുരാവസ്തുവകുപ്പിന്റെ നിയന്ത്രണത്തിലാണെന്നതിനാല്‍ ഒട്ടേറെ വിലക്കുകളുണ്ട്. ക്ഷേത്രവളപ്പിൽ പ്ലാസ്റ്റിക്ക് ഉപയോഗിക്കുന്നത് പുരാവസ്തുവകുപ്പ് വിലക്കിയിട്ടുണ്ട്. എന്നാൽ പുരത്തിന് ശേഷം അവശേഷിച്ച പ്ലാസ്റ്റിക്ക് മാലിന്യങ്ങൾ കോർപ്പറേഷനും കുടുംബശ്രീയും ക്ഷേത്രമൈതാനത്തിൽ കൂട്ടിയിട്ട് കത്തിക്കുകയായിരുന്നു. വടക്കുന്നാഥക്ഷേത്രത്തിൽ പൂരം കഴിഞ്ഞുള്ള ശുദ്ധികർമ്മങ്ങൾ പത്താം തീയതി ആരംഭിക്കും. മൂന്ന് ദിവസമാണ് ശുദ്ധിക്രീയകൾ നടക്കുക.
