മലപ്പുറം: താനൂരിൽ ബോട്ടപകടത്തിൽ ജീവൻ പൊലിഞ്ഞ കുട്ടികൾക്കും കുടുംബങ്ങൾക്ക് ശ്രദ്ധാഞ്ജലി അർപ്പിച്ച് ബാലഗോകുലം. ഇവരുടെ വേർപാടിൽ അഗാധമായ ദുഖം അറിയിക്കുന്നതായി ബാലഗോകുലം സംസ്ഥാന പ്രസിഡൻ്റ് ആർ. പ്രസന്നകുമാർ അറിയിച്ചു. കുട്ടികളുൾപ്പെടുന്ന വിനോദയാത്രകൾക്ക് ശാസ്ത്രീയമായ നിയമമാനദണ്ഡങ്ങൾ പ്രത്യേകം രൂപപ്പെടുത്തണമെന്ന് അധികാരികളോട് ആവശ്യപ്പെടുന്നതായും അദ്ദേഹം അറിയിച്ചു.
എട്ടുമാസം മാത്രം പ്രായമുള്ള പെൺകുഞ്ഞടക്കം15 കുട്ടികൾ മുങ്ങിമരിക്കാനിടയായ സാഹചര്യം ഗൗരവപൂർവം പരിശോധിക്കേണ്ടതുണ്ട്. ഉല്ലാസയാത്രയുടെ നിയമാവലികൾ പാലിക്കപ്പെടാനുള്ളതാണ്. കുട്ടികളോടൊപ്പമുള്ള യാത്രകളിൽ എല്ലാ നിയമങ്ങളും സുരക്ഷാമാനദണ്ഡങ്ങളും പാലിക്കുന്നുണ്ട് എന്ന് ഉറപ്പാക്കേണ്ട ബാധ്യത രക്ഷിതാക്കൾക്കുണ്ട്. മൂന്നുവയസ്സിനു താഴെയുള്ള കുട്ടികളെക്കൂട്ടിയുള്ള ജല വിനോദയാത്രകൾ ഒഴിവാക്കേണ്ടതാണ്.
മരണമടഞ്ഞ കുട്ടികൾക്കു ശ്രദ്ധാഞ്ജലി അർപ്പിക്കുവാൻ എല്ലാ ഗോകുലാംഗങ്ങളും മെയ് 10 വൈകിട്ട് 6 മണിക്ക് ഒരു മിനിട്ട് മൗനം ആചരിക്കും. എല്ലാവരും ഈ പ്രതീകാത്മക ശ്രദ്ധാഞ്ജലിയുടെ ഭാഗമാവണമെന്ന് ബാലഗോകുലം അഭ്യർത്ഥിക്കുന്നു.
