തിരുവനന്തപുരം: പിന്നാക്കവിഭാഗങ്ങളെ അധിക്ഷേപിച്ചതിനാണ് രാഹുല്‍ ഗാന്ധിയെ സൂറത്ത് കോടതി ശിക്ഷിച്ചതെന്ന് ബിജെപി ഒബിസി മോര്‍ച്ച സംസ്ഥാന അദ്ധ്യക്ഷന്‍ എന്‍പി രാധാകൃഷ്ണന്‍. കോടതി വിധിയെ ഒബിസി മോര്‍ച്ച സ്വാഗതം ചെയ്യുന്നുവെന്നും തിരുവനന്തപുരത്ത് നടത്തിയ വാര്‍ത്താസമ്മേളനത്തില്‍ അദ്ദേഹം പറഞ്ഞു. ഏത് ഉന്നതനായാലും കുറ്റം ചെയ്താല്‍ ശിക്ഷിക്കപ്പെടും എന്ന് തെളിയിക്കുന്നതാണ് കോടതി വിധി. കോടതി വിധിയെ തരം താണ രീതിയില്‍ അവഹേളിക്കുകയാണ് കോണ്‍ഗ്രസും ഇടതുപക്ഷവും ചെയ്യുന്നത്. ഒബിസി വിഭാഗങ്ങളോടുള്ള നിലപാട് എന്താണെന്ന് കോണ്‍ഗ്രസ് വ്യക്തമാക്കണം.
അടിസ്ഥാന ജനവിഭാഗത്തെ അധിക്ഷേപിച്ചതിനാണ് ശിക്ഷ കിട്ടിയതെന്ന് കോണ്‍ഗ്രസും സിപിഎമ്മും മറക്കരുത്. ഭരണഘടനാവകാശം ലംഘിച്ചു എന്ന് പറയുന്നവര്‍ അടിസ്ഥാന വര്‍ഗത്തിനും അവകാശങ്ങള്‍ ഉണ്ട് എന്ന് മനസിലാക്കണം. രാഹുല്‍ ഗാന്ധി ഇപ്പോഴും പഴയ ഫ്യൂഡല്‍ പ്രതാപകാലത്താണ് ജീവിക്കുന്നത്. അതിനാലാണ് അപകീര്‍ത്തി കേസ് അദ്ദേഹം കാര്യമാക്കാതിരുന്നത്. ജനാധിപത്യ അവകാശം രാഹുല്‍ ഗാന്ധിക്ക് മാത്രമല്ല പിന്നാക്ക വിഭാഗങ്ങള്‍ക്കും ഉണ്ട് എന്ന് വ്യക്തമാക്കുന്നതാണ് കോടതി വിധി. ഒബിസി വിഭാഗങ്ങളെ അവഹേളിക്കുന്നവര്‍ക്കെതിരെ ശക്തമായ പ്രതിഷേധത്തിന് ഒബിസി മോര്‍ച്ച ആഹ്വാനം ചെയ്യുന്നുവെന്നും എന്‍പി രാധാകൃഷ്ണന്‍ പറഞ്ഞു. ഒബിസി മോര്‍ച്ച സംസ്ഥാന ജനറല്‍ സെക്രട്ടറി പൂങ്കുളം സതീഷ് , ജില്ലാ പ്രസിഡന്റ് വിപിന്‍ തൃപ്പല്ലിയൂര്‍ എന്നിവരും വാര്‍ത്താസമ്മേളനത്തില്‍ സംബന്ധിച്ചു
