തിരുവനന്തപുരം : എറണാകുളം ജില്ലാ കളക്ടര്‍ ഡോ. രേണുരാജിനെ സ്ഥലം മാറ്റി. വയനാട്ടിലേക്കാണ് സ്ഥലം മാറ്റിയിരിക്കുന്നത്. എന്‍.എസ്.കെ. ഉമേഷാണ് പകരം ചുമതലയേല്‍ക്കുന്നത്.
ബ്രഹ്മപുരം മാലിന്യസംസ്‌കരണ പ്ലാന്റിലെ തീപിടിത്തം നിയന്ത്രിക്കുന്നതിനുള്ള പ്രവര്‍ത്തനങ്ങള്‍ നടന്നുവരുന്നതിനിടെയാണ് എറണാകുളം ജില്ലാ കളക്ടറെ സ്ഥലം മാറ്റിയിരിക്കുന്നത്. വിഷയവുമായി ബന്ധപ്പെട്ട് ഹൈക്കോടതി ഇന്ന് ഉച്ചയ്‌ക്ക് കളക്ടറോട് ഹാജരാകാനും ആവശ്യപ്പെട്ടിട്ടുണ്ട്.
അതേസമയം ആലപ്പുഴ, കോഴിക്കോട്, തൃശൂര്‍ എന്നീ ജില്ലകളിലെ കളക്ടര്‍മാര്‍ക്കും മാറ്റമുണ്ട്. ആലപ്പുഴ ജില്ലാ കളക്ടര്‍ കൃഷ്ണ തേജയെ തൃശൂരിലേക്കും പകരം ഹരിത വി. കുമാറിനെ ആലപ്പുഴയിലേക്കും മാറ്റി, എ. ഗീതയെ കോഴിക്കോടിലേക്കും മാറ്റിയിട്ടുണ്ട്.
ബ്രഹ്മപുരം മാലിന്യപ്ലാന്‍റിന് തീ പിടിച്ച് ദിവസങ്ങള്‍ കഴി‌ഞ്ഞിട്ടും അണയ്‌ക്കാന്‍ ആകാത്തതില്‍ രൂക്ഷ വിമര്‍ശനങ്ങളാണ് ഉയരുന്നത്. നഗരത്തിന്റെ വിവിധ പ്രദേശങ്ങളില്‍ പുക ഉയരുകയും ചെയ്തിട്ടുണ്ട്. വിഷയത്തില്‍ ഹൈക്കോടതി സ്വമേധയാ കേസെടുത്ത കോടതി കഴിഞ്ഞ ദിവസം പരിഗണിക്കുകയും ചെയ്തിരുന്നെങ്കിലും കളക്ടര്‍ ഹാജരായിരുന്നില്ല. തുടര്‍ന്ന് ഇന്ന് വീണ്ടും ഹാജരാകാന്‍ ആവശ്യപ്പെടുകയായിരുന്നു.
