ന്യൂദല്‍ഹി: ഗ്ലാമറിനപ്പുറം, ജയപരാജയങ്ങളുടെ നിര്‍ദ്ദയ സമ്മര്‍ദ്ദലോകമാണ് സിനിമയുടേത്. അവിടെ പടവുകള്‍ കയറുമ്പോഴും ഇറങ്ങേണ്ടി വരുമ്പോഴും എല്ലാം താരങ്ങള്‍ പ്രശസ്തിയുടെ പ്രലോഭനവും മോഹഭംഗവും അനുഭവിയ്‌ക്കും.
എന്തായാലും മലയാള സിനിമയിലെ രണ്ട് താരങ്ങളായ ലെനയുടെയും സംയുക്തയുടെയും ഗംഗാനദിക്കരയിലെ ചിത്രങ്ങള്‍ ഏറെ ചര്‍ച്ച ചെയ്യപ്പെടുന്നു. ഗംഗയില്‍ മുങ്ങിനിവരുന്ന ചിത്രമാണ് ലെന ഇന്‍സ്റ്റഗ്രാമില്‍ പങ്കുവെച്ചിരിക്കുന്നത്. ഋഷികേശില്‍ ആദ്യസന്ദര്‍ശനം നടത്തുകയാണ് ലെന. കാവിവസ്ത്രം ധരിച്ച ലെന പ്രാര്‍ത്ഥനാനിര്‍ഭരമായി ഗംഗയില്‍ മുങ്ങിനിവരുന്ന ചിത്രം ഒരു ആത്മാന്വേഷണത്തിന്റെ മൂഡ് നല്‍കുന്നു. ഗംഗ എന്ന ഹാഷ്ടാഗും ഉള്‍പ്പെടുത്തിയിട്ടുണ്ട്. താരത്തിന്റെ പോസ്റ്റിന് താഴെ നിരവധി ആളുകളാണ് കമന്റുമായി എത്തുന്നത്. ദൈവീകം, അഭൗമമായ അനുഭവം എന്നെല്ലാമാണ് ഈ ചിത്രത്തിന് താഴെ വരുന്ന കമന്‍റുകള്‍.
ഗംഗാനദിയുടെ കരയില്‍ ചിന്താമഗ്നയായി ഇരിക്കുന്ന ചിത്രം പങ്കുവെച്ചിരിക്കുകയാണ് നടി സംയുക്ത. ടീ ഷര്‍ട്ടും ഹെഡ്ബാന്‍റുമണിഞ്ഞ് ഋഷികേശിലെ ഗംഗാനദിക്കരയില്‍ ഇരിക്കുന്ന ചിത്രങ്ങളാണ് സംയുക്ത ഇന്‍സ്റ്റഗ്രാമില്‍ പോസ്റ്റ് ചെയ്തിരിക്കുന്നത്.
പങ്കുവെച്ച ചിത്രത്തിനൊപ്പം എനിക്കും അവള്‍ക്കും മാത്രം മനസ്സിലാകുന്ന ഒരു ഭാഷയുണ്ട് അതാണ് നിശ്ശബ്ദത എന്നും കുറിച്ചിട്ടുണ്ട്.
ഉത്തരാഖണ്ഡിലെ തെഹ്രി ഗര്‍വാള്‍ മേഖലയില്‍ പവിത്രമായ ഗംഗയുടെ തീരത്ത് സ്ഥിതി ചെയ്യുന്ന ഋഷികേശ് ഒമ്പതാം നൂറ്റാണ്ടില്‍ ആദിശങ്കരന്‍ സ്ഥാപിച്ചതാണെന്ന് പറയപ്പെടുന്നു. വിസ്മയക്ഷേത്രങ്ങളും ഭാരതീയ പാരമ്പര്യം വിളിച്ചോതുന്ന വാസ്തുവിദ്യാചാതുരികളും യോഗ ആശ്രമങ്ങളും ഋഷിമാരും നിറഞ്ഞ് ആകെയൊരു ആത്മീയാന്തരീക്ഷം നിറഞ്ഞുതുളുമ്പുന്ന ഇടമാണ് ഋഷികേശ്. മോദി സര്‍ക്കാര്‍ നമോമി ഗംഗ പദ്ധതിയനുസരിച്ച് അവിടെ നദീ ശുദ്ധീകരണവും വ്യവസായങ്ങളില്‍ നിന്നും മാലിന്യങ്ങള്‍ തള്ളുന്നത് നിയന്ത്രിച്ചതും വനവല്‍ക്കരണവും എല്ലാം ഗംഗാനദിയെ കൂടുതല്‍ പവിത്രമാക്കിയിട്ടുണ്ട്. രാം, ലക്ഷ്മണ്‍ ജൂലകളുടെ നിര്‍മ്മാണ വൈദഗ്ധ്യം യാത്രികര്‍ക്ക് ആശ്ചര്യം പകരും.ഗംഗയ്‌ക്ക് മുകളില്‍ പരന്നുകിടക്കുന്ന ഈ തൂക്കുപാലങ്ങള്‍ക്ക് ചുറ്റുമായി നിരവധി ക്ഷേത്രങ്ങളുണ്ട്. അല്‍പമെങ്കിലും ആത്മീയചായ് വുള്ളവരെ ഇവിടേക്ക് സാധാരണ യാത്ര പോകൂ. ശ്രീരാമന്‍ വനവാസകാലത്ത് മുങ്ങിക്കുളിച്ചതായി പറയുന്ന ഋഷി കുണ്ഡ്, ഋഷി കേശിലെ ഏറ്റവും വലിയ ആശ്രമമായ പരമര്‍ഥ് ആശ്രമം എന്നിവ ഇവിടെയുണ്ട്.
