കണ്ണൂര്‍ : പാര്‍ട്ടിക്കുള്ളില്‍ തനിക്കെതിരെ ചില ഗൂഢ ശക്തികള്‍ പ്രവര്‍ത്തിക്കുന്നുണ്ടെന്ന് എല്‍ഡിഎഫ് കണ്‍വീനര്‍ ഇ.പി. ജയരാജന്‍. തനിക്കെതിരെ മാധ്യമങ്ങളേയും ഉപയോഗിക്കുന്നുണ്ട്. ഇക്കാര്യം പാര്‍ട്ടിക്കുള്ളില്‍ പറയും. പുറത്തു പറയേണ്ടത് പുറത്തുപറയണം. സ്വകാര്യ മാധ്യമത്തോട് പ്രതികരിക്കുകയായിരുന്നു അദ്ദേഹം.
പി.ബി. അംഗമാവാനും പാര്‍ട്ടി സെക്രട്ടറിയാവാനും പറ്റാത്തതില്‍ തനിക്ക് വിഷമമുണ്ടെന്ന വാര്‍ത്തകളില്‍ കഴമ്പില്ല. അര്‍ഹതയുള്ള ആള്‍ക്കാരെത്തന്നെയാണ് പാര്‍ട്ടി സ്ഥാനങ്ങള്‍ ഏല്‍പ്പിച്ചത്. തനിക്കെതിരെയുള്ള കളികള്‍ക്ക് പിന്നില്‍ ആരാണെന്ന് അറിയാം. തിരുവനന്തപുരത്തു നിന്നാണ് തനിക്കെതിരെ വാര്‍ത്ത തയ്യാറാക്കി നല്‍കുന്നത്.
കൊച്ചിയിലെ ആദരിക്കല്‍ വിവാദ വും ഇപ്രകാരമാണ്. കൊച്ചിയിലെത്തിയപ്പോള്‍ യാദൃച്ഛികമായി വിളിച്ച സുഹൃത്ത് മുരളിയുടെ അഭ്യര്‍ത്ഥനപ്രകാരമാണ് ക്ഷേത്രത്തിലെത്തിയത്. അവിടെ ട്രസ്റ്റിയായ അമ്മയെ ആദരിക്കണമെന്ന് പറഞ്ഞ് അവര്‍തന്നെ തന്ന ഷാള്‍ അണിയിക്കുകയായിരുന്നു. അവര്‍ നന്ദകുമാറിന്റെ അമ്മയാണ് ആരൊക്കെയാണ് അവിടെ ഉള്ളത് എന്ന കാര്യമൊന്നും താന്‍ ശ്രദ്ധിച്ചില്ല. ഇതിനെ രാഷ്‌ട്രീയലക്ഷ്യത്തോടെ വാര്‍ത്തയാക്കി മാറ്റുന്നതിനുപിന്നില്‍ ചിലരുടെ കളികളുണ്ട്.
ടൂറിസ്റ്റ് വികസനലക്ഷ്യത്തിന്റെ ഭാഗമായാണ് റിസോര്‍ട്ട് തുടങ്ങാനുദ്ദേശിച്ചത്. പലരും സഹകരിച്ചു. തനിക്ക് വ്യക്തിപരമായി ഒരു നിക്ഷേപവുമില്ല. മകന്‍ ഷെയര്‍ ഹോള്‍ഡറാണ്. ഭാര്യ റിട്ടയര്‍ ചെയ്തപ്പോള്‍ അവന്റെ ഷെയര്‍ അവള്‍ക്ക് കൈമാറി. ഈ സ്ഥാപനം തട്ടിപ്പിലൂടെ സ്വന്തമാക്കാന്‍ ശ്രമിച്ച ആള്‍ക്കെതിരേ കമ്പനി നടപടി തുടങ്ങിയപ്പോള്‍ അയാള്‍ നേരെപ്പോയത് നേരത്തേ പറഞ്ഞ ഗൂഢാലോചനക്കാരുടെ അടുത്തേക്കാണ്. അങ്ങിനെയാണ് വിവാദങ്ങള്‍ക്ക് തുടക്കമായത്. അല്ലാതെ പാര്‍ട്ടി ഇക്കാര്യം ചര്‍ച്ചചെയ്തിട്ടില്ല.
ജാഥയില്‍ പങ്കെടുക്കാത്തതാണ് തനിക്കെതിരെയുള്ള മറ്റൊരു വിവാദം. ജാഥയില്‍ എല്ലാവരും പങ്കെടുക്കണമെന്നില്ല. പി. ജയരാജനുമായി ഒരു പ്രശ്നവുമില്ല. പാര്‍ട്ടി എന്നെ തഴയുന്നു എന്ന വാദം ശരിയല്ല. തില്ലങ്കേരിയിലെപ്പോലുള്ള പ്രശ്നങ്ങള്‍ ഗൗരവമായി കാണേണ്ടതുതന്നെയാണ്. പണ്ട് പാര്‍ട്ടി ഓഫീസിന്റെ വളപ്പില്‍പ്പോലും കയറ്റാത്തവരാണ് ഇന്ന് ചെഗുവേരയുടെയും മറ്റും ചിത്രംവെച്ച് ആളായി നടക്കുന്നതെന്നും അദ്ദേഹം കൂട്ടിച്ചേര്‍ത്തു.
അതേസമയം സിപിഎം സംസ്ഥാന സെക്രട്ടറി എം.വി. ജയരാജന്‍ നയിക്കുന്ന പ്രചാരണ ജാഥയില്‍ ആളുകളുടെ എണ്ണം കുറവായതിനാല്‍ നിര്‍ബന്ധനമായും പങ്കെടുക്കാന്‍ തൊഴിലുറപ്പ് തൊഴിലാളികള്‍ക്ക് നിര്‍ദ്ദേശം. കണ്ണൂര്‍ മയ്യില്‍ പഞ്ചായത്തിലെ തൊഴിലുറപ്പ് തൊഴിലാളികളെ ഭീഷണിപ്പെടുത്തുന്നതിന്റെ ശബ്ദരേഖയാണ് ഇപ്പോള്‍ പ്രചരിക്കുന്നത്. രാവിലെ ജാഥ തളിപ്പറമ്പില്‍ എത്തുമ്പോള്‍ തൊഴിലുറപ്പ് തൊഴിലാളികള്‍ മുഴുവന്‍ അതില്‍ പങ്കെടുക്കണം. പണിയുള്ള വാര്‍ഡുകളിലെല്ലാം കൃത്യമായി ലീവാക്കിയാണ് പോകുന്നത്. ആരും ഒഴിഞ്ഞു പോകാതെ മുഴുവന്‍ ആളുകളും ആ ജാഥയില്‍ പങ്കെടുക്കണം. വരാന്‍ സാധിക്കാത്തവര്‍ എന്നെ വിളിക്കണമെന്ന് നേതാക്കള്‍ ആവശ്യപ്പെടുന്നതിന്റെ ശബ്ദരേഖയും പുറത്തുവന്നിട്ടുണ്ട്.
