കൊച്ചി: ഇന്ധന സെസ് പിന്വലിക്കാത്തതിനെ തുടര്ന്ന് മുഖ്യമന്ത്രി പിണറായി വിജയനെതിരേ സംസ്ഥാനത്ത് എങ്ങും പ്രതിഷേധം കടുക്കുന്നതിനിടെ സുരക്ഷയുടെ പേരില് പിഞ്ചു കുഞ്ഞിനോടും പോലീസ് ക്രൂരത. കാലടി മറ്റൂരില് ആണ് സംഭവം.
സംഭവം ഇങ്ങനെ- കുഞ്ഞിന്റെ അമ്മയെ വിമാനത്താവളത്തില് എത്തിച്ച ശേഷം മടങ്ങുന്ന വഴി കുഞ്ഞിന് കടുത്ത പനി അനുഭവപ്പെട്ടു. വരുന്നവഴി കാലടി മറ്റൂരിലെ മെഡിക്കല് സ്റ്റോറിനു സമീപം കാര് നിര്ത്തി. മുഖ്യമന്ത്രിയുടെ വാഹനവ്യൂഹം എത്തുന്നതിനാല് കാര് പാര്ക്ക് ചെയ്യരുതെന്ന് പൊലീസ് ഭീഷണിപ്പെടുത്തുകയായിരുന്നു. ഇത് ചോദ്യംചെയ്ത മെഡിക്കല്ഷോപ്പ് ഉടമയോട് കട അടപ്പിക്കുമെന്ന് പൊലീസ് ഭീഷണിപ്പെടുത്തി. ഉടന് തന്നെ എസ്ഐ എത്തി വണ്ടി മാറ്റാന് ആവശ്യപ്പെട്ടുവെന്ന് കടയുടമ പറഞ്ഞു. തുടര്ന്ന് കാര് മറ്റൊരു ഭാഗത്തേക്ക് മാറ്റിയിട്ട ശേഷം കുഞ്ഞിനെയും എടുത്ത് കടയിലെത്തി മരുന്നു വാങ്ങുകയായിരുന്നു. മരുന്നു വാങ്ങി മടങ്ങുമ്പോള് എസ്ഐ വീണ്ടും തട്ടിക്കയറി. ഇതുകണ്ട് ചോദ്യം ചെയ്ത് കടയുടമയോടും എസ്ഐ തട്ടിക്കയറിയെന്ന് ഇവര് പരാതിപ്പെടുന്നു. കുഞ്ഞ് പനിച്ചുകിടക്കുന്നത് കണ്ടില്ലേ എന്ന് ചോദിച്ചപ്പോള് നീ കൂടുതല് ജാഡയൊന്നും എടുക്കേണ്ട എന്നായിരുന്നു എസ്ഐയുടെ മറുപടി. കടയുടമ ചോദ്യംചെയ്തപ്പോള് നിന്റെ കടയടപ്പിക്കുമെന്ന് പൊലീസ് ഭീഷണിപ്പെടുത്തി. എന്നാല് ധൈര്യമുണ്ടെങ്കില് അടപ്പിക്ക് എന്ന് കടയുടമയും വെല്ലുവിളിച്ചിട്ടുണ്ട്. എസ്ഐ സതീശ് എന്നയാളാണ് ഭീഷണിപ്പെടുത്തിയതെന്നും മുഖ്യമന്ത്രിക്കും പൊലീസ് ഉന്നതര്ക്കും പരാതി നല്കിയെന്നും കുടുംബം പറഞ്ഞു.
