മലപ്പുറം: കരിപ്പൂര് വിമാനത്താവളം വഴി ഒരു കിലോയിലേറെ സ്വര്ണം കടത്താന് ശ്രമിച്ച യുവാവ് പിടിയില്. മലപ്പുറം കരുവാരക്കുണ്ട് സ്വദേശി മുനീഷ് (32) ആണ് അറസ്റ്റിലായത്. 1.162 കിലോ സ്വര്ണം നാല് ക്യാപ്സ്യൂളുകളാക്കി ശരീരത്തിനുള്ളില് ഒളിപ്പിച്ചുകടത്താനാണ് മുനീഷ് ശ്രമിച്ചത്. ഇതിന് വിപണിയില് 63 ലക്ഷം രൂപ വിലവരുമെന്ന് പോലീസ് പറഞ്ഞു.
ജിദ്ദയില് നിന്നുള്ള എയര് ഇന്ത്യ എക്സ്പ്രസ് വിമാനത്തിലാണ് ഇയാള് കരിപ്പൂരിലെത്തിയത്. ഇയാള് സ്വര്ണം കടത്തുന്നതായി പോലീസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തില് കസ്റ്റംസ് പരിശോധന കഴിഞ്ഞ് പുറത്തിറങ്ങിയ ഇയാളെ പോലീസ് കസ്റ്റഡിയിലെടുക്കുകയായിരുന്നു. പിന്നാലെ നടത്തിയ എക്സ് റേ പരിശോധനയിലാണ് നാല് ക്യാപ്സ്യൂളുകളാക്കി ശരീരത്തില് ഒളിപ്പിച്ച നിലയില് സ്വര്ണമിശ്രിതം കണ്ടെത്തുന്നത്.
കരിപ്പൂര് വിമാനത്താവളത്തിന് പുറത്തുവച്ച് ഈ വര്ഷം പോലീസ് പിടികൂടുന്ന ആദ്യത്തെ സ്വര്ണക്കടത്താണിത്.
