ന്യൂദല്ഹി: ഐസിഐസിഐ വായ്പാ കേസില് വീഡിയോകോണ് ഗ്രൂപ്പ് ചെയര്മാന് വേണുഗോപാല് ധൂതിനെയും സിബിഐ അറസ്റ്റ് ചെയ്തു. സ്വകാര്യമേഖലാ ബാങ്കിന്റെ തലപ്പത്തിരിക്കുമ്പോള് വീഡിയോകോണ് ഗ്രൂപ്പിന് നല്കിയ 3,000 കോടിയിലധികം രൂപയുടെ വായ്പയില് ക്രമക്കേട് ആരോപിച്ച് ഐസിഐസിഐ ബാങ്ക് മുന് സിഇഒ ചന്ദ കൊച്ചാറും ഭര്ത്താവ് ദീപക് കൊച്ചാറും സിബിഐ അറസ്റ്റിലായി ദിവസങ്ങള്ക്കു ശേഷമാണ് വേണുഗോപാലിന്റെയും അറസ്റ്റ്. മുംബൈ കോടതിയില് ഹാജരാക്കിയ ശേഷം കൊച്ചാര്മാരെ ചോദ്യം ചെയ്യുകയാണ്.
ക്രിമിനല് ഗൂഢാലോചന അടക്കം വകുപ്പുള് ചേര്ത്താണ് കൊച്ചാര് ദമ്പതികളേയും ധൂതിനേയും സിബിഐ പ്രതികളാക്കിയിട്ടുള്ളത്. 2019ലെ അഴിമതി നിരോധന നിയമത്തിലെ വ്യവസ്ഥകളും കേസില് ഉള്പ്പെടുത്തിയിട്ടുണ്ട്. ഉപഭോക്തൃ ഇലക്ട്രോണിക്സ്, ഓയില് ആന്ഡ് ഗ്യാസ് എക്സ്പ്ലോറേഷന് കമ്പനിയായ വീഡിയോകോണ് ഗ്രൂപ്പിനെ അനുകൂലിച്ചു എന്നാരോപിച്ച് 59 കാരിയായ ചന്ദ കൊച്ചാര് 2018 ഒക്ടോബറില് ഐസിഐസിഐ ബാങ്കിന്റെ സിഇഒയും മാനേജിംഗ് ഡയറക്ടറും സ്ഥാനം രാജിവച്ചിരുന്നു.
