തിരുവനന്തപുരം: ശബരിമല യുവതി പ്രവേശനത്തിനെതിരായ പ്രതിഷേധവുമായി ബന്ധപ്പെട്ട് രജിസ്റ്റര് ചെയ്ത കേസുകളില് 41 കേസുകള് പിന്വലിച്ചെന്ന് സര്ക്കാര് നിയമസഭയില് അറിയിച്ചു. പൊലീസ് എടുത്ത നിസാര കേസുകള് പിന്വലിക്കുന്നില്ലെന്ന് നേരത്തെ ആക്ഷേപമുയര്ന്നതിനു പിന്നാലെയാണ് സര്ക്കാര് കേസുകള് പിന്വലിച്ചത്.
ആകെ 2656 കേസുകളാണ് യുവതി പ്രവേശനവുമായി ബന്ധപ്പെട്ട് രജിസ്റ്റര് ചെയ്തിരുന്നത്. 93 കേസുകള് പിന്വലിക്കാന് നിരാക്ഷേപ പത്രം നല്കിയിട്ടുണ്ടെന്നും സര്ക്കാര് അറിയിച്ചു. ക്രിമിനല് സ്വഭാവമില്ലാത്ത കേസുകള് പിന്വലിക്കുവാന് ഒരു വര്ഷം മുന്പ് തീരുമാനമെടുത്തെങ്കിലും നടപടിയുണ്ടായിരുന്നില്ല. പൊതുമുതല് നശിപ്പിക്കല്, സ്ത്രീകള്ക്കെതിരെയുളള ആക്രമണം, മതസ്പര്ധ വളര്ത്താനുളള നീക്കം എന്നീ വകുപ്പുകള് ചുമത്തിയ കേസുകള് പിന്വലിക്കില്ല. കേസ് നിലവിലുളളതിനാല് പലര്ക്കും ജോലി ചെയ്യുന്നതിനും വിദേശത്തേക്ക് പോകുന്നതിനും തടസമുണ്ടായെന്ന് പരാതിയുയര്ന്നിരുന്നു. സ്ത്രീകള് അടക്കം നിരവധി പേരെ പല കേസുകളിലും പ്രതി ചേര്ത്തിരുന്നു.
