അഹമ്മദാബാദ്: പ്രധാനമന്ത്രി നരേന്ദ്രമോദിയെ രാവണനെന്ന് വിളിച്ച കോണ്‍ഗ്രസിന് മറുപടിയുമായി മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫഡ് നാവിസ്. അയോധ്യയില്‍ രാമക്ഷേത്രം നിര്‍മ്മിക്കുന്ന പ്രധാനമന്ത്രി നരേന്ദ്രമോദി ഉത്തമനായ രാമഭക്തനാണെന്നും ഭരണത്തിലിരിക്കെ ക്ഷേത്രനിര്‍മ്മാണത്തിന് തടസ്സം നിന്ന കോണ്‍ഗ്രസ് നേതാക്കളാണ് രാവണന്റെ പ്രതീകമെന്നും ഫഡ്നാവിസ് വെജല്‍പൂരില്‍ നടന്ന തെരഞ്ഞെടുപ്പ് റാലിയില്‍ പറഞ്ഞു.
ഗുജറാത്തില്‍ ബിജെപി വന്‍ വിജയത്തിലേക്കാണ് നീങ്ങുന്നത്. കോണ്‍ ഗ്രസ് വലിയ തോല്‍വിയാണ് നേരിടാന്‍ പോകുന്നത്. കോണ്‍ഗ്രസ് തോല്‍ക്കാന്‍ തുടങ്ങുമ്പോഴെല്ലാം, മോദിക്കെതിരെ തിരിയുകയാണ്. കൃത്യമായ നയമോ പദ്ധതിയോ നേതാവോ ഇല്ലാത്തപ്പോള്‍ മോദിയെ അധിക്ഷേപിക്കാന്‍ തുടങ്ങും.
രാമന്റെ അസ്തിത്വത്തില്‍ സംശയം പ്രകടിപ്പിച്ച പാര്‍ട്ടി, രാമന്‍ ശരിക്കും ജനിച്ചതാണോ, രാമന്‍ ജനിച്ചുവെന്നതിന് എന്താണ് തെളിവ് എന്നു ചോദിച്ച പാര്‍ട്ടിയുടെ അധ്യക്ഷനാണ് മോദിക്കെതിരെ സംസാരിക്കുന്നത് ദേവേന്ദ്ര ഫഡ്നാവിസ് പറഞ്ഞു. പ്രധാനമന്ത്രി നരേന്ദ്രമോദിയുടെ വികസനനയങ്ങളെ പിന്തുണയ്‌ക്കുന്ന ഗുജറാത്തിലെ ജനത ഇത്തവണയും വന്‍ഭൂരിപക്ഷത്തില്‍ ബിജെപിയെ അധികാരത്തില്‍ എത്തിക്കുമെന്നും അദ്ദേഹം കൂട്ടിച്ചേര്‍ത്തു.
