തിരുവനന്തപുരം : സംസ്ഥാനത്ത് മായം കലര്ന്ന വെളിച്ചെണ്ണകള് വിതരണം ചെയ്യുന്നത് തടയുന്നതിനായി പ്രത്യേക പരിശോധനകള്ക്ക് തുടക്കമായി. ഓപ്പറേഷന് ഓയില് എന്നപേരില് എന്നപേരില് വ്യാപക തെരച്ചിലിനാണ് ആരോഗ്യവകുപ്പ് തുടക്കമിട്ടിരിക്കുന്നത്. രണ്ട് ദിവസത്തിനുള്ളില് നൂറോളം കേന്ദ്രങ്ങളില് പരിശോധന നടത്താന് സംഘത്തിനായെന്നും മന്ത്രി വീണാ ജോര്ജ് അറിയിച്ചു.
മായം കലര്ന്ന വെളിച്ചെണ്ണയുടെ വില്പ്പന സംസ്ഥാനത്ത് വ്യാപകമായതിനെ തുടര്ന്നാണ് ഇത് കേന്ദ്രീകരിച്ച് പരിശോധന നടത്താന് ആരോഗ്യ വകുപ്പ് തീരുമാനിച്ചത്. ഇതിന്റെ പേരില് അന്വേഷണത്തിന് പ്രത്യേക സംഘത്തേയും നിയോഗിക്കുകയായിരുന്നു. എണ്ണയില് സള്ഫറിന്റെ സാന്നിധ്യം ഉണ്ടോയെന്നും പരിശോധിക്കുന്നതാണ്. പോരായ്മകള് കണ്ടെത്തിയവര്ക്കെതിരേ നോട്ടീസ് നല്കുകയും പിഴ ചുമത്തുകയും ചെയ്തിട്ടുണ്ട്. വരും ദിവസങ്ങളിലും പരിശോധനകള് തുടരുന്നതാണ്. ബ്രാന്ഡ് രജിസ്ട്രേഷന് എല്ലാ വെളിച്ചെണ്ണ നിര്മാതാക്കളും നിര്ബന്ധമായും കരസ്ഥമാക്കേണ്ടതാണ്.
സംസ്ഥാനത്ത് ഒരു നിര്മാതാവിന് ഒരു ബ്രാന്ഡ് വെളിച്ചെണ്ണ മാത്രമേ പുറത്തിറക്കാന് അനുവാദമുള്ളൂ. മായം കലര്ന്ന വെളിച്ചെണ്ണ വില്പ്പന തടയുന്നതിന്റെ ഭാഗമായി ഇത് കര്ശനമായും നടപ്പിലാക്കും. ബ്രാന്ഡ് രജിസ്ട്രേഷന് ഇല്ലാത്ത വെളിച്ചെണ്ണയുടെ വില്പ്പന തടയുന്നതിന് ഇത്തരം വെളിച്ചെണ്ണ പിടിച്ചെടുക്കുന്നതും നിയമ നടപടിക്ക് വിധേയമാക്കുമെന്നും മന്ത്രി കൂട്ടിച്ചേര്ത്തു.
