ബെംഗളൂരു: മുന്‍കൂട്ടി അനുമതി വാങ്ങാതെ കെജിഎഫ്2ലെ ഗാനങ്ങള്‍ ഭാരത് ജോഡോ യാത്രയുടെ പ്രചാരണത്തിന് ഉപയോഗിച്ചതിന് കോണ്‍ഗ്രസ്, ഭാരത് ജോഡോ യാത്ര എന്നീ ട്വിറ്റര്‍ ഹാന്‍ഡിലുകള്‍ക്ക് വിലക്കേര്‍പ്പെടുത്തി. ബെംഗളൂരു കോടതിയാണ് ട്വിറ്ററിനോട് ഈ ഹാന്‍ഡിലുകള്‍ക്ക് വിലക്കേര്‍പ്പെടുത്താന്‍ നിര്‍ദേശിച്ചത്.
ഈ ഗാനങ്ങളുടെ ഉടമസ്ഥാവകാശമുള്ള എംആര്‍ടി മ്യൂസിക്കാണ് പകര്‍പ്പാവകാശം ലംഘിച്ച് ഗാനം മോഷ്ടിച്ച് ഉപയോഗിച്ചു എന്നാരോപിച്ച് രാഹുല്‍ഗാന്ധിയ്‌ക്കും ജയറാം രമേശിനും എതിരെ കേസ് നല‍്കിയിരുന്നു. യശ്വന്ത് പൂര്‍ പൊലീസ് സ്റ്റേഷനിലാണ് കേസ്. ഭാരത് ജോഡോ യാത്രയുടെ ഭാഗമായുള്ള പദയാത്രയിലാണ് അനുമതി വാങ്ങാതെ ഗാനം ഉപയോഗിച്ചത്. ഗാനം ഉപയോഗിക്കാന്‍ അനുവദിച്ചാല്‍ അത് വ്യാപകമായ കോപ്പിയടിക്ക് പ്രോത്സാഹനമായിത്തീരും എന്നാണ് കോടതിയുടെ നിരീക്ഷണം.
ധീര ധീര എന്ന ഗാനവും ഉപയോഗിച്ചിട്ടുണ്ട്. രാഹുല്‍ ഗാന്ധിയെ വെച്ച് റോക്കിയുടെ ശക്തമായ വരവ് കാണിക്കാന്‍ കോണ്‍ഗ്രസ് നടത്തിയ ശ്രമം പരാജയമായി എന്ന് മാത്രം. രാഹുല്‍ഗാന്ധിക്ക് പുറമെ എഐസിസി ജനറല്‍ സെക്രട്ടറി ജയറാം രമേശ്, പാര്‍ട്ടിയുടെ സാമൂഹിക മാധ്യമ വിഭാഗത്തിന്റെ ചുമതലയുള്ള സുപ്രിയ ഷ്രിനാഠെ എന്നിവര്‍ക്കെതിരെ ഐടി വകുപ്പ്, പകര്‍പ്പാവകാശലംഘനം, ഇന്ത്യന്‍ ശിക്ഷാനിയമം എന്നിവ പ്രകാരമാണ് കേസ് നല്‍കിയിട്ടുള്ളത്. എംആര്‍ടി മ്യൂസിക് മാനേജര്‍ എം. നവീന്‍ കുമാറാണ് കേസ് നല്‍കിയത്. ജയറാം രമേശ് തന്റെ ഔദ്യോഗിക ട്വിറ്റര്‍ പേജില്‍ യാത്രയുടെ രണ്ട് വീഡിയോകള്‍ പങ്കുവെച്ചിരുന്നു. ഇത് രണ്ട് വീഡിയോയിലും കെജിഎഫ് ഗാനം ഉപയോഗിച്ചിട്ടുണ്ട്. അനുമതി മുന്‍കൂട്ടി വാങ്ങാതെയാണ് ഈ രണ്ട് ഗാനങ്ങളും ഉപയോഗിച്ചിട്ടുള്ളത്. എംആര്‍ടിയുടെ ഉടമസ്ഥതയിലുള്ള ഗാനങ്ങളാണ് ഇവ. കെജിഎഫ് 2ലെ ഹിന്ദി ഗാനങ്ങളാണ് ഉപയോഗിച്ചിരിക്കുന്നത്. ദക്ഷിണേന്ത്യയില്‍ സൂപ്പര്‍ ഹിറ്റായ കെജിഎഫ് രണ്ടാം ഭാഗത്തിലെ ഹിന്ദി ഗാനങ്ങളുടെ പകര്‍പ്പാവകാശം നേടാന്‍ കോടികളാണ് തങ്ങള്‍ ചെലവഴിച്ചതെന്ന് കമ്പനി പറയുന്നു.
ഈ പാട്ട് നിയമവിരുദ്ധമായി ഡൗണ്‍ലോഡ് ചെയ്തെടുത്ത ശേഷം കോണ്‍ഗ്രസിനാവശ്യമായ ദൃശ്യങ്ങള്‍ കൂടി കൂട്ടിച്ചേര്‍ത്താണ് ഉപയോഗിച്ചത്. കേട്ടാല്‍ ഇത് കോണ്‍ഗ്രസിന്റെ ഗാനമാണെന്ന് തോന്നിക്കുന്ന രീതിയിലായിരുന്നു ഉപയോഗിച്ചതെന്ന് എംആര്‍ടി മ്യൂസിക്കിന്റെ അഭിഭാഷകന്‍ പറയുന്നു. ഈ വീഡിയോയില്‍ ഭാരത് ജോഡോ യാത്രയുടെ ലോഗോയും ഉപയോഗിച്ചിട്ടുണ്ട്.
നിയമത്തോടും സ്വകാര്യ വ്യക്തികളോടും സ്ഥാപനങ്ങളോടും അവരുടെ അവകാശങ്ങളോടുമുള്ള പരസ്യമായ അവഹേളനമാണ് ഇതെന്ന് അഭിഭാഷകന്‍ ചൂണ്ടിക്കാട്ടി. ഈ വാദമുഖങ്ങള്‍ കോടതിക്ക് സ്വീകാര്യമായി.
കന്യാകുമാരിയില്‍ നിന്നും സെപ്തംബര്‍ ഏഴിനാണ് ഭാരത് ജോഡോ യാത്ര ആരംഭിച്ചത്. 2023 ജനവരി 30ന് കശ്മീരില്‍ യാത്ര അവസാനിക്കും. ഭാരത് ജോഡോ യാത്ര കേരളം, തമിഴ്നാട്, കര്‍ണ്ണാടക, ആന്ധ്ര, തെലുങ്കാന എന്നീ അഞ്ച് ദക്ഷിണേന്ത്യന്‍ സംസ്ഥാനങ്ങള്‍ പിന്നിട്ട് കഴിഞ്ഞു.
