തിരുവനന്തപുരം: മ്യൂസിയത്തില് പ്രഭാതസവാരിക്കിറങ്ങിയ വനിതാ ഡോക്ടര്ക്ക് നേരെ ആക്രമണമുണ്ടായ സംഭവത്തില് പ്രതിയെപ്പറ്റി കൂടുതല് സൂചനകള് ലഭിച്ചതായി വിവരം. സംഭവവുമായി ബന്ധപ്പെട്ട് അന്വേഷണ സംഘം ഒരാളെ കസ്റ്റഡിയിലെടുത്ത് ചോദ്യം ചെയ്തു വരികയാണ്. കഴിഞ്ഞ ദിവസമാണ് പ്രത്യേക സംഘം കേസിന്റെ അന്വേഷണ ചുമതല ഏറ്റെടുത്തത്.
യുവതിയെ ആക്രമിച്ച ശേഷം പ്രതി മടങ്ങി പോയ വഴിയിലെ സി.സി.ടി.വി. ദൃശ്യങ്ങള് കേന്ദ്രീകരിച്ചായിരുന്നു അന്വേഷണം. എല്.എം.എസ്. ജംഗ്ഷനില് നിന്ന് നന്ദാവനം വഴി ബേക്കറി ജംഗ്ഷനിലൂടെ പാളയത്തിലേയ്ക്ക് പോയ പ്രതി തിരികെ മ്യൂസിയത്തില് എത്തുകയും അവിടെ നിന്ന് മാനവീയം വീഥി വഴി വഴുതക്കാടേക്ക് കടക്കുകയുമായിരുന്നു എന്നാണ് അന്വേഷണ സംഘം കണ്ടെത്തിയത്.
കന്റോണ്മെന്റ് അസിസ്റ്റന്റ് കമ്മീഷണറുടെ നേതൃത്വത്തിലുള്ള 13 അംഗ സംഘമാണ് കേസ് അന്വേഷിക്കുന്നത്. സംഭവം നടന്ന് അഞ്ച് ദിവസം പിന്നിട്ടെങ്കിലും പ്രതിയെ പിടികൂടാന് കഴിയാത്തതിനാലാണ് പുതിയ നടപടി. മ്യൂസിയം സ്റ്റേഷന് സി.ഐയും എസ്.ഐയുമാണ് നേരത്തെ കേസ് അന്വേഷിച്ചിരുന്നത്. തിരുവനന്തപുരം ഡി.സി.പിയ്ക്കാണ് അന്വേഷണ ചുമതല
