തിരുവനന്തപുരം: പാറശാലയില് ഷാരോണിന് വിഷം നല്കി കൊന്ന കേസിലെ പ്രതി ഗ്രീഷ്മ ആത്മഹത്യാ ശ്രമം നടത്തിയത് നാടകമെന്ന് ക്രൈംബ്രാഞ്ചിന്റെ അനുമാനം. ചോദ്യം ചെയ്യലില് നിന്ന് ഒഴിഞ്ഞുമാറുന്നതിനുള്ള നാടകമാകാം ആത്മഹത്യാശ്രമമെന്നാണ് അന്വേഷണം സംഘം കണക്കാക്കുന്നത്. അതേ സമയം ഗ്രീഷ്മയ്ക്ക് ഇപ്പോള് പ്രശ്നങ്ങളൊന്നും ഇല്ലെന്ന് റൂറല് എസ്പി ഡി.ശില്പ അറിയിച്ചു.
‘ശുചി മുറിയിലെ ലായനി കഴിച്ചുവെന്നാണ് അവള് പറഞ്ഞത്. ഇതിനെ തുടര്ന്ന് ഉടന് ആശുപത്രിയിലെത്തിച്ചു. അവിടെ നിന്ന് ഉള്ളിലുള്ളത് ഛര്ദിച്ച് കളയാനുള്ള മരുന്ന് നല്കി. ഇപ്പോള് ഒരു പ്രശ്നവുമില്ല, നില തൃപ്തികരമാണ്’ എസ്പി മാധ്യമങ്ങളോട് പറഞ്ഞു. നിലവില് തിരുവനന്തപുരം മെഡിക്കല് കോളേജിലെ ഐസിയുവില് നിരീക്ഷണത്തിലാണ് ഗ്രീഷ്മ. അതേ സമയം ഗ്രീഷ്മയെ നേരത്തെ നിശ്ചയിച്ചതില് നിന്ന് വ്യത്യസ്തമായ മറ്റൊരു ശുചിമുറിയിലേക്ക് കൊണ്ടുപോയ വനിതാ പോലീസ് ഉദ്യോഗസ്ഥര്ക്കെതിരെ അടിയന്തരമായി നടപടിയെടുക്കുമെന്നും എസ്പി കൂട്ടിച്ചേര്ത്തു.
