മലപ്പുറം: മലപ്പുറത്ത് കാക്കഞ്ചേരിയിലെ പള്ളിക്കല് ക്ഷേത്രത്തിന് നേരെ സാമൂഹ്യവിരുദ്ധരുടെ ആക്രമണം. പൂട്ടും ഗ്രില്ലും തകര്ത്ത് ക്ഷേത്രവളപ്പിനുള്ളിലേക്ക് കയറിയ അക്രമികള് ക്ഷേത്രക്കിണറിന്റെ തൂണുകള് തകര്ത്തു.
ക്ഷേത്രം ഭാരവാഹികള് തേഞ്ഞിപ്പലം പൊലീസ് സ്റ്റേഷനില് പരാതി നല്കി. രാവിലെ ക്ഷേത്രത്തിലെത്തിയ ജീവനക്കാരാണ് സംഭവം കണ്ടത്. ക്ഷേത്രസംരക്ഷണ സമിതിയ്ക്ക് കീഴിലുള്ളതാണ് മണക്കാട്ട് പള്ളിക്കല് മഹാശിവക്ഷേത്രം.
ഈയടുത്ത കാലത്താണ് ക്ഷേത്രത്തിന്റെ പുനരുദ്ധാരണം നടന്നത്. ക്ഷേത്രവുമായി ബന്ധപ്പെട്ട് സമീപവാസികളുമായി ചില അസ്വാരസ്യങ്ങള് നിലനില്ക്കുന്നുണ്ട്. ക്ഷേത്രത്തിന് ചുറ്റുമുള്ള സ്ഥലം സമീപവാസികള് കയ്യേറിയതാണെന്ന് ക്ഷേത്രംഭാരവാഹികള്ക്ക് പരാതിയുണ്ട്. അതുകൊണ്ട് തന്നെ ഈ ആക്രമണം ആസൂത്രിതമാണെന്ന് ക്ഷേത്രഭാരവാഹികള് പറയുന്നു.
