ന്യൂദല്‍ഹി: ഭാരതി എയര്‍ടെല്‍ എട്ടു നഗരങ്ങളില്‍ 5ജി ടെലികോം സേവനങ്ങള്‍ ഇന്നു തന്നെ ആരംഭിക്കുമെന്ന് വ്യക്തമാക്കി ചെയര്‍മാന്‍ സുനില്‍ ഭാരതി മിത്തല്‍. നാല് മെട്രോ സിറ്റികളിലും ഇന്ന് 5ജി ലഭ്യമാക്കും. 2024 മാര്‍ച്ചോടു കൂടി രാജ്യത്താകമാനം സേവനം വ്യാപിപ്പിക്കുമെന്ന് അദേഹം വ്യക്തമാക്കി. ചെയര്‍മാന്‍ പറഞ്ഞത് അനുസരിച്ച് എട്ട് നഗരങ്ങളില്‍ ഇന്നു വൈകിട്ടോടെ എയര്‍ടെല്‍ 5ജി സേവനം ലഭ്യമാക്കിയിട്ടുണ്ട്.
രാജ്യത്തെ ഏറ്റവും പഴയ സ്വകാര്യ ടെലികോം ഓപ്പറേറ്ററായ എയര്‍ടെല്‍ എട്ട് പ്രധാന നഗരങ്ങളില്‍ 5ജി മൊബൈല്‍ സേവനങ്ങള്‍ ആരംഭിക്കുകയാണെന്നും 2023 മാര്‍ച്ചോടെ മിക്ക ഭാഗങ്ങളും 2024 മാര്‍ച്ചോടെ രാജ്യം മുഴുവനും കവര്‍ ചെയ്യുമെന്നും ഇന്ത്യമൊബൈല്‍കോണ്‍ഗ്രസ്(ഐ.എം.സി) 2022 ല്‍ സംസാരിക്കവെ അദ്ദേഹം പറഞ്ഞു. ദല്‍ഹിയില്‍ നടക്കുന്ന ആറാമത് ഇന്ത്യ മൊബൈല്‍ കോണ്‍ഫറന്‍സില്‍ വച്ച് പ്രധാനമന്ത്രി നരേന്ദ്രമോദിയാണ് 5ജി പദ്ധതി ഉദ്ഘാടനം ചെയ്തത്. ആദ്യ ഘട്ടത്തില്‍ രാജ്യത്തെ 13 നഗരങ്ങളില്‍ മാത്രമാണ് സേവനം ലഭ്യമാകുക.
അടുത്ത രണ്ട് വര്‍ഷം കൊണ്ട് രാജ്യം മുഴുവന്‍ 5ജി സേവനങ്ങള്‍ ലഭ്യമാകും. തടസ്സമില്ലാത്ത കവറേജ്, ഉയര്‍ന്ന ഡേറ്റ നിരക്ക്, കുറഞ്ഞ നിര്‍ജീവത, വിശ്വസനീയമായ ആശയവിനിമയം, ഹൈ റെസലൂഷന്‍ വീഡിയോ സ്ട്രീമിംഗ് എന്നിവ 5ജി സാങ്കേതികവിദ്യ നല്‍കും. കഴിഞ്ഞ മാസം നടന്ന 5 ജി സ്‌പെക്ട്രം ലേലത്തില്‍ മുന്നില്‍ എത്തിയ റിലയന്‍സ് ജിയോ 88,000 കോടി രൂപയുടെ സ്‌പെക്ട്രം ആണ് സ്വന്തമാക്കിയത്. ദീപാവലിയോടെ ഡല്‍ഹി, കൊല്‍ക്കത്ത, മുബൈ, ചെന്നൈ നഗരങ്ങളിലും 2023 ഡിസംബറോടെ രാജ്യത്തെമ്പാടും ജിയോ 5 ജി മൊബൈല്‍ ഇന്റര്‍നെറ്റ് സേവനം ലഭ്യമാക്കുമെന്ന് റിലയന്‍സ് ചെയര്‍മാന്‍ മുകേഷ് അംബാനി പ്രഖ്യാപിച്ചിട്ടുണ്ട്.
ഇന്ത്യയില്‍ ഇപ്പോള്‍ തന്നെ പത്തു കോടി ആളുകള്‍ക്ക് 5 ജി സ്മാര്‍ട്ട് ഫോണുകള്‍ ഉണ്ടെന്നും 5 ജി സേവനത്തിലേക്ക് അപ്‌ഗ്രേഡ് ചെയ്യാന്‍ അവര്‍ കാത്തിരിക്കയാണെന്നും സ്വീഡിഷ് കമ്പനിയായ എറിക്‌സണ്‍ ഇന്ത്യയുടെ റിപ്പോര്‍ട്ടില്‍ പറയുന്നു. സേവനം തുടങ്ങുന്നതോടെ 5 ജി സ്മാര്‍ട്ട് ഫോണുകളുടെ വില്‍പ്പന കുതിച്ചുയരും.
