തിരുവനന്തപുരം: നടന്‍ സുരേഷ് ഗോപിയ്‌ക്ക് ഇപ്പോഴും ആ വാക്കുകള്‍ മറക്കാന്‍ കഴിയുന്നില്ല. താന്‍ ധരിച്ച കാവി സ്യൂട്ട് കണ്ട് എലിസബത്ത് രാജ്ഞി അഭിനന്ദന വാക്കുകള്‍ ചൊരിഞ്ഞ നിമിഷം. “താങ്കളുടെ സ്യൂട്ട് വളരെ നന്നായിരിക്കുന്നു”- ഇതായിരുന്നു എലിസബത്ത് രാജ്ഞിയുടെ മൃദുലമായ വാക്കുകള്‍.
ഇപ്പോള്‍ എലിസബത്ത് രാജ്ഞി വിടപറയുമ്പോള്‍ അഞ്ച് വര്‍ഷം മുന്‍പ് ബക്കിംഗ്ഹാം കൊട്ടാരത്തില്‍ വെച്ച് രാജ്ഞിക്ക് ഹസ്തദാനം നല്‍കിയതിന്റെ ഓര്‍മ്മകള്‍ നടന്‍ സുരേഷ് ഗോപിയെ ഇന്നും കോരിത്തരിപ്പിക്കുന്നു. ‘ആ ഓര്‍മ്മകള്‍ ഇന്നും തന്റെ മനസ്സില്‍ വലിയ അഭിമാനനിമിഷമായി നിലകൊള്ളുന്നു’ എന്നായിരുന്നു സുരേഷ് ഗോപി ട്വിറ്ററില്‍ കുറിച്ചത്.
10 ദിവസം നീണ്ട ദുഖാചരണത്തിന്റെ കരിനിഴലിലാണ് ഇപ്പോള്‍ ബ്രിട്ടന്‍. 2017ല്‍ ബക്കിംഗ് ഹാം കൊട്ടാരം സുരേഷ് ഗോപി സന്ദര്‍ശിച്ചിരുന്നു. യുകെ-ഇന്ത്യ കള്‍ച്ചറല്‍ റിസപ്ഷന്‍ വര്‍ഷത്തിലാണ് 2017ല്‍ സുരേഷ് ഗോപി എലിസബത്ത് രാജ്ഞിയെ നേരിട്ട് കണ്ടത്.
