തിരുവനന്തപുരം:സുരേഷ് ഗോപി എന്ന സൂപ്പർതാരത്തി പ്രൗഢിയും തലയെടുപ്പും മങ്ങിയിട്ടില്ല എന്ന് തെളിയിച്ച ചിത്രമാണ് ജോഷി സംവിധാനം ചെയ്ത പാപ്പൻ.
തിയറ്ററിൽ അമ്പത് കോടി തിളക്കത്തിൽ വിജയ കുതിപ്പ് നടത്തിയ സൂപ്പര് താരം സുരേഷ് ഗോപിയുടെ പാപ്പന് ഇപ്പോള് ഒടിടിയിലും നേടിയത് സ്വര്ണ്ണത്തിളക്കം. ഒടിടിയിൽ സെപ്തംബര് ഏഴിന് റിലീസ് ചെയ്ത പാപ്പന് രണ്ട് ദിവസമായി ഇന്ത്യൻ സിനിമകളുടെ ടോപ്പ് ലിസ്റ്റിൽ ഒന്നാമതായി ജൈത്രയാത്ര തുടരുന്നു.
സീ ഫൈവിലൂടെയാണ് ഉത്രാട ദിനമായ സെപ്റ്റംബർ 7 ന് പാപ്പന് ഒടിടി വഴി ജനങ്ങളിലേക്ക് എത്തിയത്. ബോളിവുഡ് താരം വിദ്യുത് ജാംവാലിന്റെ ഖുദ ഹഫിസിനെയും കന്നട സൂപ്പർ സ്റ്റാർ കിച്ച സുദീപ് നായകനായ പാൻ ഇന്ത്യൻ കന്നഡ ചിത്രം വിക്രാന്ത് റോണയേയും പിന്തള്ളി കൊണ്ടാണ് പാപ്പൻ ഒടിടിയിൽ ഒന്നാം സ്ഥാനം കൈയ്യടക്കിയിരിക്കുന്നത്. സീ 5 പ്ലാറ്റ്ഫോമിന്റെ ചരിത്രത്തിൽ ആദ്യമായാണ് അവർ സ്ട്രീം ചെയ്യുന്ന ഒരു മലയാള ചിത്രം ഇന്ത്യ ട്രെൻഡിംഗ് ലിസ്റ്റിൽ ഒന്നാമതെത്തുന്നത്.
ജോഷിയുമായുള്ള കൂട്ടുകെട്ടും പൊലീസ് വേഷവും പ്രധാന ആകര്ഷണങ്ങളായിരുന്നെങ്കിലും റെക്കോഡ് കളക്ഷൻ നേടിയ സുരേഷ് ഗോപി ചിത്രമായി പാപ്പന് മാറിയതിന് പിന്നില് സുരേഷ് ഗോപിയുടെ താരശോഭയാണെന്ന് പറയപ്പെടുന്നു. സുരേഷ് ഗോപിയ്ക്കൊപ്പം മകൻ ഗോകുൽ സുരേഷ്, നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു.
