തിരുവനന്തപുരം: സിപിഐ സംസ്ഥാന സമ്മേളനത്തിന് പിരിവ് നൽകാത്തതിൽ കാരക്കോണം പുല്ലന്തേരിയിൽ പ്രവർത്തിക്കുന്നു അങ്കണവാടിയിലെ അധ്യാപിക രാമവർമ്മൻചിറ സ്വദേശി തങ്കത്തിനെ പഞ്ചായത്ത് മെമ്പർ അനിതകുമാരിയും പാർട്ടി പ്രവർത്തകരും ഭീക്ഷണിപ്പെടുത്തി എന്ന് പരാതി.
കഴിഞ്ഞ ബുധനാഴ്‌ച്ച രാവിലെയാണ് സി പി ഐ മെമ്പറും പ്രവർത്തകരും പരിവ് ചോദിച്ചു എത്തിയത്. തന്റെ പക്കൽ പിരിവു നൽകാൻ പണമില്ലെന്ന് പറഞ്ഞതോടെ ഇവർ ക്ലാസ് മുറിയിലെ മേശപ്പുറത്ത് അടിച്ച് ബഹളമുണ്ടാക്കുകയും തന്നെ അസഭ്യം വിളിച്ച് ഭീഷണപ്പെടുത്തുകയും ,തന്റെ ഫോൺ എടുത്ത് എറിയുകയും ചെയ്തു. ഈ ബഹളം കേട്ട് കുഞ്ഞുങ്ങൾ കരയാൻ തുടങ്ങിയിട്ടും ബഹളം മതിയാക്കിയില്ല എന്ന് തങ്കം പറയുന്നു.
അങ്കണ വാടിയിലെ പാലു, മുട്ടയും വിതരണം ചെയ്യുന്നത് തങ്ങളുടെ സർക്കാരാണ്. പിരിവ് നൽകിയില്ലെങ്കിൽ ജോലി കളയും എന്ന് ആക്രോശിച്ചതായും അധ്യാപിക പറഞ്ഞു. തുടർന്ന് സി ഡി പി ഒ യ്‌ക്കും പഞ്ചായത്ത് അധികൃതർക്കും പരാതി നൽകി. കുട്ടികൾ പേടിച്ച് കരയുന്നതു കേട്ട് നാട്ടുകാരെത്തിയപ്പോഴാണ് പിരിവുകാർ പുറത്തു പോയതെന്ന് അധ്യാപിക പറഞ്ഞു.
