പ്യോങ്യാങ്: കൊറോണ കാലത്ത് ഉത്തരകൊറിയന് ഭരണാധികാരി കിം ജോങ് ഉന് പനി പിടിച്ച് ഗുരുതരാവസ്ഥയില് ആയിരുന്നെന്ന് വെളിപ്പെടുത്തലുമായി സഹോദരി കിം യോ ജോങ്. അപൂര്വമായാണ് കിമ്മിന്റെ ആരോഗ്യനിലയെ കുറിച്ചുള്ള വാര്ത്തകള് ഉത്തരകൊറിയ പുറത്തുവിടാറുള്ളത്. കടുത്ത പനിയായിരുന്നു കിമ്മിന് അനുഭവപ്പെട്ടത്. എന്നാല് സ്വന്തം ആരോഗ്യം മോശമായ അവസ്ഥയിലും സ്വന്തം ജനങ്ങളെ കുറിച്ചുള്ള ആശങ്ക മൂലം കിമ്മിന് ഇരിക്കപ്പൊറുതിയുണ്ടായില്ലെന്നും സഹോദരി പറഞ്ഞു.
തന്റെ രാജ്യം കോവിഡിനെതിരെ വിജയം നേടിയെന്നും അവര് അവകാശപ്പെട്ടു. എന്നാല് എന്നുമുതലാണ് കിം രോഗബാധിതനായത് എന്ന കാര്യം അവര് പറഞ്ഞില്ല. ദക്ഷിണ കൊറിയയില് നിന്ന് അയച്ച വസ്തുക്കള് വഴിയാണ് ഉത്തരകൊറിയയില് കോവിഡ് വൈറസ് എത്തിയതെന്ന വാദവും കിം യോ ജോങ് ആവര്ത്തിച്ചു. ഉത്തരകൊറിയ കോവിഡ് മുക്തമായി പ്രഖ്യാപിച്ചതിനു പിന്നാലെ തലസ്ഥാനമായ പ്യോങ്യാങ്ങില് ആരോഗ്യ പ്രവര്ത്തകരുടെ യോഗത്തില് സംസാരിക്കുകയായിരുന്നു കിം യോ ജോങ്. കിം യോ ജോങിന്റെ വാക്കുകള് കേട്ട് വേദിയിലിരുന്നവര് പൊട്ടികരയുകയും ചെയ്തു.
ദക്ഷിണ കൊറിയയ്ക്ക് എതിരെയും ജോങ് രൂക്ഷ വിമര്ശനം നടത്തി. ഉത്തര കൊറിയയില് കോവിഡ് പകരുന്നതായും, കിം ജോങ് ഉന്നിനെ വിമര്ശിക്കുന്ന തരത്തിലുള്ള ലക്ഷക്കണക്കിന് ലഘുലേഖകള് വിതരണം ചെയ്യുന്നതിനായി അതിര്ത്തിയില് ബലൂണുകള് പറത്തുകയാണെന്നും സഹോദരി ആരോപിച്ചു. ഇത്തരം പ്രവൃത്തികള് തുടരുകയാണെങ്കില് വെറുതെ ഇരിക്കില്ലെന്നും അവര് മുന്നറിയിപ്പു നല്കി.
കോവിഡ് മഹാമാരിയുടെ തുടക്കത്തില് ഉത്തരകൊറിയയില് നിന്ന് പോസിറ്റീവ് കേസുകളൊന്നും റിപ്പോര്ട്ട് ചെയ്തിരുന്നില്ല. മെഡിക്കല് സൗകര്യങ്ങളുടെ അപര്യാപ്തത മൂലം ആളുകളില് കോവിഡ് പരിശോധന ഇല്ലാത്തതു മൂലമാണ് അതെന്നായിരുന്നു പ്രചരിച്ചിരുന്ന റിപ്പോര്ട്ടുകള്. കോവിഡ് മുക്തമായതോടെ ഉത്തരകൊറിയയില് ഏര്പ്പെടുത്തിയിരുന്ന കടുത്ത നിയന്ത്രണങ്ങള് എടുത്തു കളയാന് കിം ഉത്തരവിട്ടു. കോവിഡ് കാലത്ത് കിം പൊതുവെ പരിപാടികളില് പങ്കെടുക്കില്ലായിരുന്നു. നാളുകള്ക്ക് ശേഷം പൊതുവേദിയില് പ്രത്യക്ഷപ്പെട്ട കിമ്മിന്റെ ശരീരം മെലിഞ്ഞതായും, ആരോഗ്യം മോശമാണെന്നും ചില മാധ്യമങ്ങള് റിപ്പോര്ട്ട് ചെയ്തിരുന്നു.
