തിരുവനന്തപുരം: കേശവദാസപുരത്ത് വയോധികയെ കൊലപ്പെടുത്തി കിണറ്റിലിട്ട അതിഥിത്തൊഴിലാളി ആദം അലി (21) പിടിയില്. ചെന്നൈയില് നിന്നും ആര്പിഎഫ് ആണ് പ്രതിയെ അറസ്റ്റ് ചെയ്തത്. വയോധികയെ കൊന്നതിനുശേഷം ആദം അലി ഒളിവിലായിരുന്നു. ഇയാള്ക്കെതിരെ പോലീസ് തിരച്ചില് ശക്തമാക്കതിനെ തുടര്ന്നാണ് അലിയെ ചെന്നൈയില് നിന്നും പിടികൂടിയത്.
കേശവദാസപുരത്ത് രക്ഷാപുരി മീനംകുന്നില് വീട്ടില് ദിനരാജിന്റെ ഭാര്യ മനോരമ(68)യാണ് കൊല്ലപ്പെട്ടത്. ഇന്നലെ രാത്രിയോടെയാണ് സംഭവം. ആദം അലി മനോരമ താമസിക്കുന്ന വീടിന് അടുത്ത വീട്ടില് ജോലികെത്തിയത് ആറ് മാസം മുമ്പാണ്. കെട്ടിടം പണിക്കായി ബംഗാളില് നിന്ന് വന്ന തൊഴിലാളിയാണ് ആദം അലി. അതിഥിത്തൊഴിലാളികള് സ്ഥിരമായി വെള്ളമെടുക്കാന് പോകുന്ന വീടാണ് മനോരമയുടേത്.
ദിനരാജും ഭാര്യ മനോരമയും കോളജ് ഓഫ് എജ്യുക്കേഷനില് നിന്നു വിരമിച്ച ഉദ്യോഗസ്ഥരാണ്. മനോരമയും ഭര്ത്താവുമാണ് ഈ വീട്ടില് കഴിഞ്ഞിരുന്നത്. ഭര്ത്താവ് വര്ക്കലയിലെ മകളെ കാണാന് പോയിരുന്നു. തിരിച്ചെത്തിയപ്പോള് മനോരമയെ കാണാതിരുന്നതോടെയാണ് അന്വേഷണം ആരംഭിച്ചത്. മനോരമയെ കാണാനില്ലെന്ന പരാതിയില് ഇന്നലെ വൈകിട്ട് മൂന്ന് മണിക്കണ് പോലീസ് അന്വേഷണം തുടങ്ങിയത്. പോലീസ് നായ മണം പിടിച്ച് അയല്പക്കത്തെ വീട്ടിലെ കിണറിനു സമീപം വന്നു നിന്നു. തുടര്ന്നു ഫയര്ഫോഴ്സിനെ എത്തിച്ച് നടത്തിയ തിരച്ചലിലാണ് മൃതദേഹം കിട്ടിയത്.
വീട്ടില് കയറി വയോധികയെ കൊലപ്പെടുത്തിയ ശേഷം മൃതദേഹം തൊട്ടടുത്ത ആള്ത്താമസമില്ലാത്ത വീട്ടിലെ കിണറ്റില് തള്ളുകയായിരുന്നു പോലീസ് കണ്ടെത്തി. ഇതിന്റെ സിസിടിവി ദൃശങ്ങളും പോലീസിന് ലഭിച്ചു. കാലുകളില് കല്ലുകെട്ടിയനിലയിലാണ് മൃതദേഹം കിണറ്റില് നിന്ന് കണ്ടെത്തിയത്. ആദം അലിയ്ക്ക് ഒപ്പം താമസിച്ചിരുന്ന നാലുപേരെ പോലീസ് കസ്റ്റഡിയിലെടുത്തിട്ടുണ്ട്.
