ലഖ് നൗ: ശ്രീകാന്ത് ത്യാഗിയുടെ വീടിനോട് ചേര്‍ന്നുള്ള കയ്യേറ്റം ബുള്‍ഡോസര്‍ ഉപയോഗിച്ച് പൊളിച്ച യോഗി സര്‍ക്കാരിന്റെ നടപടിയെ വിമര്‍ശിച്ച് കോണ്‍ഗ്രസ് നേതാവ് പ്രിയങ്ക ഗാന്ധി.
ശ്രീകാന്ത് ത്യാഗിയ്‌ക്കെതിരായി കൈക്കൊണ്ട നടപടി വെറും പുറംപൂച്ചാണെന്നാണ് പ്രിയങ്കയുടെ വാദം. ശ്രീകാന്ത് ത്യാഗിയുടെ വീട് നിയമവിരുദ്ധമായി ഉയര്‍ത്തിയതായിരുന്നില്ലേ എന്ന് യോഗി സര്‍ക്കാരിന് ഇത്രയും കാലം അറിയാമായിരുന്നില്ലേ എന്ന ചോദ്യമാണ് പ്രിയങ്ക ഉയര്‍ത്തുന്നത്. ശ്രീകാന്ത് ത്യാഗി ബിജെപി നേതാക്കളുടെ കൂടെ നില്‍ക്കുന്ന ചിത്രങ്ങളും പ്രിയങ്ക ട്വിറ്ററില്‍ പങ്കുവെച്ചു.
ശ്രീകാന്ത് ത്യാഗി സ്ത്രീകളെ ഭീഷണിപ്പെടുത്തുന്ന വീഡിയോ ഞായറാഴ്ച പുറത്തിറങ്ങിയതോടെയാണ് ഇയാള്‍ക്കെതിരെ ശക്തമായ നടപടിയെടുക്കാന്‍ തീരുമാനിച്ചത്. ഇയാള്‍ക്കെതിരെ ഇന്ത്യന്‍ ശിക്ഷാനിയമത്തിലെ വിവിധ വകുപ്പുകള്‍ പ്രകാരം കേസെടുത്ത ശേഷം എല്ലാവശങ്ങളും പഠിച്ചശേഷമാണ് യോഗി സര്‍ക്കാര്‍ ബുള്‍ഡോസര്‍ പ്രയോഗം നടത്തിയത്. യോഗിയുടെ മുഖം നോക്കാതെയുള്ള നടപടിക്ക് സമൂഹമാധ്യമങ്ങളില്‍ ശക്തമായ പിന്തുണയാണ് ലഭിക്കുന്നത്.
ശ്രീകാന്ത് ത്യാഗി കുറ്റകൃത്യങ്ങള്‍ നടത്താന്‍ ബിജെപിയെപ്പോലും മറയാക്കിയിരുന്നതായി പറയുന്നു. എന്തായാലും ഇന്ത്യയിലെ ഒരു മുഖ്യമന്ത്രിയും ധൈര്യപ്പെടാത്ത നടപടിയാണ് യോഗി ആദിത്യനാഥ് എടുത്തിരിക്കുന്നതെന്ന രീതിയിലുള്ള കമന്‍റുകളാണ് സമൂഹമാധ്യമങ്ങളില്‍ പ്രചരിക്കുന്നത്. യോഗിയുടെ നടപടികളില്‍ രാഷ്‌ട്രീയമില്ലെന്നും ഇനിയും യോഗിയുടെ ബുള്‍ഡോസറുകള്‍ കാണുമ്പോള്‍ ന്യൂനപക്ഷ കാര്‍ഡ് ഉപയോഗിച്ച് രക്ഷപ്പെടാന്‍ ആരും ശ്രമിക്കരുതെന്ന താക്കീതും ചിലര്‍ സമൂഹമാധ്യമങ്ങളില്‍ ഉയര്‍ത്തുന്നുണ്ട്.
വീടിനോട് ചേര്‍ന്നുള്ള കയ്യേറ്റം പൊളിച്ചു. ഇനി അടുത്തത് അറസ്റ്റാണെന്ന് ബിജെപി ഐടി സെല്‍ ചുമതല വഹിക്കുന്ന അമിത് മാളവ്യ ട്വീറ്റ് ചെയ്തു.
ആഗസ്ത് 10 ന് മാത്രമേ കോടതിയില്‍ കീഴടങ്ങണം എന്നാവശ്യപ്പെട്ട് ശ്രീകാന്ത് ത്യാഗി നല്‍കിയ പരാതി പരിഗണിക്കാന്‍ കഴിയൂ എന്ന നോയിഡ കോടതി വിധിച്ചതോടെ പൊലീസ് തന്നെ ശ്രീകാന്ത് ത്യാഗിയെ അറസ്റ്റ് ചെയ്യുമെന്ന് വേണം കരുതാന്‍. ഇയാളെക്കുറിച്ച് വിവരം നല്‍കുന്നവര്‍ക്ക് യുപി പൊലീസ് 25000 രൂപ ഇനാം പ്രഖ്യാപിച്ചിട്ടുണ്ട്. ശ്രീകാന്ത് ത്യാഗിയെ അറസ്റ്റ് ചെയ്യാന്‍ പൊലീസിന് നിര്‍ദേശം നല്‍കിയിട്ടുണ്ടെന്ന് ഉത്തര്‍പ്രദേശ് അഡീഷണല്‍ ഡയറക്ടര്‍ ജനറല്‍ (എഡിജിപി) പ്രശാന്ത് കുമാര്‍ പറ‍ഞ്ഞു.
