തിരുവനന്തപുരം: ഇന്സ്റ്റഗ്രാമിലൂടെ പരിചയപ്പെട്ട കോളേജ് വിദ്യാര്ത്ഥിനിയെ ലോഡ്ജിലെത്തിച്ച് പീഡിപ്പിച്ച കേസിലെ പ്രതിയും ടിക് ടോക് താരവുമായ വീനിത് പിടിയില്. ചിറയിന്കീഴ് വെള്ളല്ലൂര് കീഴ്പേരൂര് കൃഷ്ണക്ഷേത്രത്തിന് സമീപം വിനീതിനെയാണ് (25) തമ്പാനൂര് പോലീസ് അറസ്റ്റുചെയ്തത്. പരവൂര് സ്വദേശിയായ പെണ്കുട്ടിയെ തമ്പാനൂരിലെ ലോഡ്ജിലെത്തിച്ച് കഴിഞ്ഞമാസം പീഡിപ്പിച്ച കേസിലാണ് നടപടി.
ഇന്സ്റ്റഗ്രാമില് പരിചയപ്പെടുന്ന പെണ്കുട്ടികളെ ഫേസ്ബുക്ക്, വാട്സാപ്പ് തുടങ്ങിയവയിലൂടെ പിന്തുടര്ന്ന് സൗഹൃദം ഉറപ്പിക്കുന്നതാണ് ഇയാളുടെ രീതിയെന്നും സമാനമായ വേറെയും കേസുകളെക്കുറിച്ച് വിവരം ലഭിച്ചതായും പോലീസ് അറിയിച്ചു. തനിക്ക് പുതിയ കാര് വാങ്ങുന്നതിനായി ഒപ്പം വരണമെന്ന് ആവശ്യപ്പെട്ടായിരുന്നു പെണ്കുട്ടിയെ ഇയാള് ക്ഷണിച്ചത്. തിരുവനന്തപുരത്തെത്തിയപ്പോള് ഫ്രഷ് ആവാമെന്നു പറഞ്ഞ് ലോഡ്ജില് മുറിയെടുത്ത ശേഷമായിരുന്നു പീഡനം. പെണ്കുട്ടി സുഹൃത്തുക്കളോട് വിവരം പറഞ്ഞതോടെയാണ് പോലീസില് പരാതിയെത്തിയത്.
പ്രതിയുടെ മൊബൈല് ഫോണുകള് ഉള്പ്പെടെ കസ്റ്റഡിയിലെടുത്ത് പൊലീസ് വിശദമായ അന്വേഷണം ആരംഭിച്ചു. ഇയാളുടെ ഫോണ് പരിശോധിച്ച പൊലീസ് സംഘത്തിന് ഒട്ടേറെ സ്ത്രീകള് വിനീതിന്റെ വലയില് കുടുങ്ങിയതായി കണ്ടെത്തി. ഇയാളുടെ മൊബൈല് ഫോണില് നിന്ന് ലഭിച്ച മറ്റ് യുവതികളുമായുള്ള സ്വകാര്യ ദൃശ്യങ്ങളും ചാറ്റുകളും കാട്ടി അവരെ ഭീഷണിപ്പെടുത്തി ഇയാള് പണം തട്ടിയിട്ടുണ്ടോ എന്നുള്ളതും പോലീസ് അന്വേഷിച്ചു വരികയാണ്.
പ്രതിയെ ഇന്ന് കോടതിയില് ഹാജരാക്കും. അസി.കമ്മിഷണര് ഷാജിയുടെ നേതൃത്വത്തില് സി.ഐ പ്രകാശ്, എസ്.ഐ സുബിന്, എ.എസ്.ഐ ഗോപകുമാര്, പോലീസുകാരായ സജു, അജയകുമാര്, സുനില്, അനില് എന്നിവരടങ്ങുന്ന സംഘമാണ് പ്രതിയെ പിടികൂടിയത്. ഇയാള്ക്കെതിരെ കണ്ടോണ്മെന്റ് പോലീസ് സ്റ്റേഷനില് മോഷണവും കിളിമാനൂര് പൊലീസ് സ്റ്റേഷനില് അടിപിടി കേസും ഉള്ളതായി പൊലീസ് പറഞ്ഞു.
