കണ്ണൂര്: കണ്ണൂര് സര്വകലാശാലയില് മലയാളം അസോസിയേറ്റ് പ്രൊഫസര് തസ്തികയിലേക്ക് നിയമനത്തിനായി പ്രസിദ്ധീകരിച്ച താത്കാലിക പട്ടികയിലെ ഒന്നാം റാങ്കുകാരിയും മുഖ്യമന്ത്രിയുടെ പ്രൈവറ്റ് സെക്രട്ടറിയുമായ കെ.കെ. രാഗേഷിന്റെ ഭാര്യ പ്രിയ വര്ഗീസ് സമര്പ്പിച്ചത് യഥാര്ത്ഥ സര്ട്ടിഫിക്കറ്റല്ലെന്ന് ആരോപണം. അധ്യാപന പരിചയ സര്ട്ടിഫിക്കറ്റിനു പകരം പ്രിയ വര്ഗീസ് സമര്പ്പിച്ചത് കേരള വര്മ്മ കോളജ് പ്രിന്സിപ്പാള് നല്കിയ എംപ്ലോയ്മെന്റ് സര്ട്ടിഫിക്കറ്റാണെന്നാണ് വിവരാവകാശ നിയമപ്രകാരം നല്കിയ അപേക്ഷയില് കണ്ടെണ്ടത്തിയത്. സിന്ഡിക്കേറ്റംഗമായ ഡോ. ആര്.കെ. ബിജു വിവരാവകാശ നിയമപ്രകാരം നല്കിയ അപേക്ഷയിലാണ് ഇത് വ്യക്തമായത്.
വിവരാവകാശരേഖകള് പ്രകാരം ഡോ. പ്രിയവര്ഗീസ് 2015 ജൂലൈ 29 മുതല് 2018 ഫെബ്രുവരി ഒന്പത് വരെ ഫാക്കല്ട്ടി ഡെവലപ്പ്മെന്റ് പ്രോഗ്രാം പ്രകാരം പിഎച്ച്ഡി പ്രോഗ്രാമിനും തുടര്ന്ന് 2019 ആഗസ്റ്റ് ഏഴ് മുതല് 2021 ജൂണ് 15 വരെ കണ്ണൂര് സര്വകലാശാലയില് സ്റ്റുഡന്റ് ഡയറക്ടറായും സേവനം അനുഷ്ഠിക്കുകയാണ് ചെയ്തത്. കൂടാതെ 2021 ജൂലൈ ഏഴ് മുതല് കേരള ഭാഷ ഇന്സ്റ്റിറ്റിയൂട്ടില് സേവനം അനുഷ്ഠിച്ചു വരികയുമാണ്. എന്നാല് കണ്ണൂര് സര്വകലാശാലയില് അധ്യാപന പരിചയം തെളിയിക്കുവാന് വേണ്ടണ്ടി ഹാജരാക്കിയ എംപ്ലോയ്മെന്റ് സര്ട്ടിഫിക്കറ്റില് ഇക്കാര്യങ്ങള് ഒന്നും തന്നെ രേഖപ്പെടുത്തിയിട്ടില്ല.
അതിനാല് സ്ക്രീനിംഗ് കമ്മറ്റി അംഗങ്ങള്ക്ക് കാര്യങ്ങള് പരിശോധിക്കാന് സാധിച്ചില്ല. യുജിസി ചട്ടപ്രകാരം ഗവേഷണകാലവും അനധ്യാപക തസ്തികയിലുള്ള ഡെപ്യൂട്ടേഷന് കാലവും അധ്യാപന പരിചയമായി കണക്ക് കൂട്ടാനാവില്ല. അതിനാല് പ്രിയ വര്ഗീസിനെ അയോഗ്യയാക്കണമെന്നും 15 വര്ഷത്തെ അധ്യാപന പരിചയവും ആവശ്യത്തിന് ഗവേഷണ പ്രസിദ്ധീകരണങ്ങളുമുള്ള രണ്ടണ്ടാം റാങ്കുകാരനായ ഡോ. ജോസഫ് സ്കറിയ്ക്ക് നിയമനം നല്കണമെന്നും കാണിച്ച് ഡോ. ആര്.കെ. ബിജു വിസിക്ക് കത്ത് നല്കിയിട്ടുണ്ട്.
അധ്യാപന പരിചയ സര്ട്ടിഫിക്കറ്റിനു പകരം ഒന്നാം റാങ്കുകാരി പ്രിയ വര്ഗീസ് കേരള വര്മ്മ കോളജ് പ്രിന്സിപ്പാള് നല്കിയ എംപ്ലോയ്മെന്റ് സര്ട്ടിഫിക്കറ്റ് ഹാജരാക്കിയത് സ്ക്രീനിംഗ് കമ്മറ്റിയെ കബളിപ്പിക്കുന്നതിന് ബോധപൂര്വം നടത്തിയ ശ്രമമാണെന്നും കത്തില് പറയുന്നു. മുഴുവന് പരിശോധനയും കഴിഞ്ഞതിനുശേഷമാണ് കേരള പബ്ലിക് സര്വീസ് കമ്മീഷന് ഉള്പ്പെടെ റാങ്ക് ലിസ്റ്റ് പ്രസിദ്ധീകരിക്കാറുള്ളത്. എന്നാല് കണ്ണൂര് സര്വകലാശാലയില് ഇന്റര്വ്യു കഴിഞ്ഞ് ഏഴുമാസമായിട്ടും ഫിസിക്കല് വെരിഫിക്കേഷന് പോലും നടത്താതെ റാങ്ക് ലിസ്റ്റ് പ്രസിദ്ധീകരിച്ചത് ദുരൂഹമാണെന്നും കത്തില് വ്യക്തമാക്കുന്നു.
