തിരുവനന്തപുരം : സംസ്ഥാനത്തെ വടക്കന് ജില്ലകളില് അതിശക്തമായ മഴയ്ക്ക് സാധ്യതയെന്ന് മുന്നറിയിപ്പുമായി കാലാവസ്ഥാ നിരീക്ഷണ കേന്ദ്രം. ഒഡീഷ തീരത്തിന് മുകളിലായി ന്യൂനമര്ദ്ദവും അറബിക്കടലിലെ ന്യൂനമര്ദ്ദപാത്തിയും നിലനില്ക്കുന്നതാണ് ശക്തമായ മഴയ്ക്കുള്ള കാരണം.
മൂന്ന് ജില്ലകളില് ഓറഞ്ച് അലര്ട്ട് പ്രഖ്യാപിച്ചിരിക്കുകയാണ്. വയനാട്, കണ്ണൂര്, കാസര്കോട് എന്നീ ജില്ലകളിലാണ് ഓറഞ്ച് അലേര്ട്ട് പ്രഖ്യാപിച്ചിരിക്കുന്നത്. ഒപ്പം മറ്റ് ജില്ലകളില് യെല്ലോ അലേര്ട്ടും പ്രഖ്യാപിച്ചിട്ടുണ്ട്.
അതേസമയം കഴിഞ്ഞ ദിവസങ്ങളെ അപേക്ഷിച്ച് തെക്കന് ജില്ലകളില് മഴ ശക്തമാകുമെന്നും മുന്നറിയിപ്പുണ്ട്. ഉച്ചയ്ക്ക് ശേഷം കൂടുതല് മഴ കിട്ടും. അടുത്ത ദിവസങ്ങളിലും മഴ തുടരും. ശക്തമായ കാറ്റിനും ഉയര്ന്ന തിരമാലകള്ക്കും സാധ്യതയുള്ളതിനാല് മത്സ്യതൊഴിലാളികള് കടലില് പോകരുതെന്ന് മുന്നറിയിപ്പുണ്ട്.
ശക്തമായ മഴയിലും കാറ്റിലും സംസ്ഥാനത്ത് പല സ്ഥലങ്ങളിലും വ്യാപക നാശനഷ്ടം റിപ്പോര്ട്ട് ചെയ്തിട്ടുണ്ട്. വയനാട്ടില് വ്യാപകമായി കൃഷി നശിച്ചതായി റിപ്പോര്ട്ട് ചെയ്തിട്ടുണ്ട്. കോതമംഗലത്തും പരിസരങ്ങളിലും മഴയിലും കാറ്റിലും മരങ്ങള് ഒടിഞ്ഞുവീണു. കീരംപാറ പഞ്ചായത്തിലാണ് കൃഷിക്കടക്കം നാശം നേരിട്ടത്. കാറ്റില് ഇലക്ട്രിക് പോസ്റ്റുകളടക്കം ഒടിഞ്ഞുവീണു. മലയന്കീഴ്- നാടുകാണി റോഡില് മരം വീണ് ഗതാഗതം തടസപ്പെട്ടു.
