മൂന്നാര്‍: ഉരുള്‍പൊട്ടല്‍ ദുരന്തത്തില്‍ 70 പേരുടെ ജീവന്‍ നഷ്ടമായ പെട്ടിമുടിയില്‍ ആശങ്കയായി വീണ്ടും കനത്ത മഴ. മുന്‍ കരുതലെന്ന നിലയില്‍ ഇതര സംസ്ഥാന തൊഴിലാളികളുടെ 35 കുടുംബങ്ങളിലെ 118 പേരെ മാറ്റിപ്പാര്‍പ്പിച്ചു. രാജമുടി എല്‍പി സ്‌കൂളിലേക്കാണ് ഇവരെ മാറ്റിയത്. റവന്യൂ വകുപ്പിന്റെ നേതൃത്വത്തില്‍ വിവിധ വകുപ്പുകളുടെ സഹകരണത്തോടെ ക്യാമ്പിനാവശ്യമായ സജ്ജീകരണങ്ങള്‍ ഏര്‍പ്പെടുത്തിയിട്ടുണ്ട്.
ഇന്നലെ രാവിലെ വരെയുള്ള 24 മണിക്കൂറില്‍ മേഖലയില്‍ 19.5 സെ.മീ. മഴയാണ് ലഭിച്ചത്. കഴിഞ്ഞ ഏതാനും ദിവസങ്ങളായി പെട്ടിമുടിയിലും പരക്കേ മഴയുണ്ടായിരുന്നു. മുമ്പ് ദുരന്തമുണ്ടായ പ്രദേശങ്ങളിലെല്ലാം മഴവെള്ളപ്പാച്ചില്‍ ശക്തമാണ്. ഉരുള്‍പൊട്ടി വന്ന സ്ഥലത്ത് നീര്‍ച്ചാല് പോലെ വലിയ തോതില്‍ വെള്ളം ഒഴുകുന്നുണ്ട്. ഈ സ്ഥലത്ത് വീണ്ടും ദുരന്തങ്ങള്‍ക്ക് സാധ്യതയുണ്ടെന്നാണ് വിദഗ്ധരും പറയുന്നത്.
ദുരന്തത്തിന് പിന്നാലെ ഈ സ്ഥലത്ത് നിന്ന് തദ്ദേശീയ തൊഴിലാളികളെല്ലാം ഒഴിഞ്ഞുപോയിരുന്നു. ഇവിടങ്ങളില്‍ ജോലിക്ക് മാത്രമാണ് ഇവരെത്തുന്നത്. നിലവില്‍ മേഖലയിലെ വീടുകളില്‍ ഇതര സംസ്ഥാന തൊഴിലാളികള്‍ മാത്രമാണുള്ളത്. 2020 ആഗസ്ത് ആറന് രാത്രി 10.45 ഓടെയാണ് കണ്ണന്‍ദേവന്‍ കമ്പനിയുടെ രാജമല ഡിവിഷനിലെ പെട്ടിമുടിയില്‍ ഉരുള്‍പൊട്ടലുണ്ടായത്. കല്ലും ചെളിയും വെള്ളവുമെല്ലാം താഴ്‌വാരത്ത് പെട്ടിമുടി പുഴയോട് ചേര്‍ന്ന് താമസിച്ചിരുന്ന തോട്ടം തൊഴിലാളികളുടെ ലയത്തിന് മുകളില്‍ പതിക്കുകയായിരുന്നു.
പ്രതികരിക്കാൻ ഇവിടെ എഴുതുക: