കല്‍പ്പറ്റ: തന്റെ ഓഫിസ് അടിച്ചുതകര്‍ത്ത് എസ്എഫ്‌ഐക്കാര്‍ വച്ച വാഴ എടുത്തുമാറ്റി അതേ സീറ്റില്‍ ഇരുന്ന് രാഹുല്‍ ഗാന്ധി. വയനാട്ടിലെ ഓഫീസില്‍ നേരിട്ടെത്തിയ രാഹുല്‍ ഓഫിസ് സന്ദര്‍ശിക്കുകയായിരുന്നു. കസേരയില്‍ വച്ചിരുന്ന വാഴ എടുത്തു മാറ്റി അതേ സീറ്റില്‍ തന്നെ ഇരുന്നാണ് അദ്ദേഹം നേതാക്കളോട് സംസാരിച്ചത്.
എസ്എഫ്ഐ അക്രമത്തിന് ശേഷം ഓഫീസ് അതുപോലെ തന്നെ നിലനിര്‍ത്തിയിരുന്നു. ഇവിടെയെത്തി സ്ഥിതിഗതികള്‍ നിരീക്ഷിച്ച രാഹുല്‍ സീറ്റിലിരുന്ന വാഴ എടുത്ത് പിന്നിലേക്ക് മാറ്റി. തുടര്‍ന്ന് വിഡി സതീശന്‍ രാഹുലിന് കസേര ഒരുക്കി നല്‍കി. അവിടെ ഇരുന്നുകൊണ്ടാണ് രാഹുല്‍ നേതാക്കളുമായി സംസാരിച്ചത്.
‘ഇത് എന്റെ ഓഫീസാണ്. പക്ഷേ അതിനും മുന്‍പ് ഇത് വയനാട്ടിലെ ജനങ്ങളുടെ ഓഫീസ് ആണ്. വയനാട്ടിലെ ജനങ്ങളുടെ ശബ്ദമാണ്. അക്രമം ഒരു പ്രശ്നവും പരിഹരിക്കില്ല. ഇത് ചെയ്ത കുട്ടികള്‍ നിരുത്തരവാദപരമായാണ് പെറുമാറിയതെങ്കിലും എനിക്കവരോട് വെറുപ്പോ ശത്രുതയോ ഇല്ല.’ എന്ന് രാഹുല്‍ ട്വിറ്ററില്‍ കുറിച്ചു.
