കോഴിക്കോട്: ബാലുശ്ശേരി ആള്ക്കൂട്ട ആക്രമണത്തിന് പിന്നില് എസ്ഡിപിഐ ലീഗ് പ്രവര്ത്തകരാണെന്ന് പോലീസിന്റെ റിമാന്ഡ് റിപ്പോര്ട്ട്. ജിഷ്ണുവിനെ ആക്രമിച്ച കേസില് ആരോപണ വിധേയനായ ഡിവൈഎഫ്ഐ പ്രവര്ത്തകനേയും സിപിഎം അനുഭാവികളേയും സംരക്ഷിക്കുന്ന നിലപാടാണ് പോലീസ് ഇപ്പോള് സ്വീകരിച്ചിട്ടുള്ളത്.
കേസിലെ 11,12 പ്രതികളാണ് ഡിവൈഎഫ്ഐ പ്രവര്ത്തകന് നജാഫ്, ഇടത് അനുഭാവി ഷാലിദ് എന്നിവര്. ഇവര് ഒഴികെയുള്ളവര്ക്കാണ് ആള്ക്കൂട്ട ആക്രമണത്തില് പങ്കെന്നാണ് പോലീസ് റിപ്പോര്ട്ടില് പറയുന്നത്. ഇരുവരേയും കേസില് നിന്നും ഒഴിവാക്കാന് തുടക്കം മുതല് തന്നെ പോലീസിന് മേല് സമ്മര്ദ്ദം ഉണ്ടായിരുന്നു. സംഭവത്തില് 29 പേര്ക്കെതിരെ ജാമ്യമില്ലാ വകുപ്പ് ചുമത്തി പോലീസ് കേസെടുത്തത്.
ബാലുശ്ശേരിക്കടുത്ത് പാലൊളിമുക്കിലാണ് ഡിവൈഎഫ്ഐ ത്രിക്കുറ്റിശ്ശേരി ബ്ലോക്ക് കമ്മിറ്റി അംഗവും ഡിവൈഎഫ്ഐ നേതാവുമായ ജിഷ്ണുവിന് നേരെ ആക്രമണമുണ്ടായത്. എസ്ഡിപിഐയുടെ പോസ്റ്റര് നശിപ്പിച്ചെന്ന പേരില് 30 ഓളം പേര് ചേര്ന്നായിരുന്നു മര്ദ്ദനം. രാഷ്ടീയ വിരോധമാണ് ജിഷ്ണുവിന് നേരെയുണ്ടായ ആക്രമണത്തിന് പിന്നിലെന്നാണ് പോലീസ് എഫ്ഐആറില് പറയുന്നത്.
തന്റെ പിറന്നാളാഘോഷം കഴിഞ്ഞ് വീട്ടിലേക്ക് മടങ്ങുകയായിരുന്ന ജിഷ്ണുവിനെ സംഘം തടഞ്ഞു നിര്ത്തി. ഫ്ളക്സ് ബോര്ഡ് നശിപ്പിക്കാന് വന്നതാണെന്നും പാര്ട്ടി നേതാക്കള് ആയുധം കൊടുത്തു വിട്ടെന്നും കഴുത്തില് കത്തിവച്ച് പറയിച്ച് അതിന്റെ വീഡിയോയും പ്രതികള് ചിത്രീകരിച്ചു. ജിഷ്ണുവിനെ ജാതിപ്പേര് പറഞ്ഞ് അധിക്ഷേപിക്കുകയും വെള്ളത്തില് മുക്കികൊല്ലാനും ശ്രമമുണ്ടായിട്ടുണ്ട്.
രണ്ട് മണിക്കൂറോളം മര്ദ്ദിച്ചതിന് ശേഷമാണ് ആള്ക്കൂട്ടം ജിഷ്ണുവിനെ പോലീസിന് കൈമാറിയത്. മുഖത്തും കണ്ണിനും സാരമായി പരിക്കേറ്റ ജിഷ്ണു കോഴിക്കോട് മെഡിക്കല് കോളേജ് ആശുപത്രിയില് ചികിത്സയിലായിരുന്നു
