മുംബൈ: മഹാരാഷ്‌ട്രാ മഹാവികാസ് അഘാഡി സഖ്യ സര്‍ക്കാരിന്റെ ഭരണം പ്രതിസന്ധിയില്‍ നില്‍ക്കേ ഏക്നാഥ് ഷിന്‍ഡേയുടെ നേതൃത്വത്തിലുള്ള വിമത സംഘത്തിന് ശിവസേന ബാലസാഹെബ് എന്ന് പേരിട്ടു. ഭൂരിപക്ഷം തികയ്‌ക്കാനാകാതെ ഭരണം തുടരാന്‍ സാധിക്കാത്ത അവസ്ഥയിലാണ് ഉദ്ധവ് താക്കറെ സര്‍ക്കാര്‍. എന്നാല്‍ കോണ്‍ഗ്രസ്- എന്‍സിപിക്കൊപ്പം സഖ്യത്തില്‍ ഭരണം തുടരാന്‍ സാധിക്കില്ലെന്ന നിലപാടില്‍ തന്നെയാണ് ഷിന്‍ഡേ സംഘം.
എന്നാല്‍ ബാലാസാഹെബ് എന്ന് പേരിട്ടെങ്കിലും രാഷ്‌ട്രീയ പാര്‍ട്ടിയാക്കുന്നതിനുള്ള തീരുമാനം വൈകും. ‘ഞങ്ങളുടെ സംഘം ശിവസേന ബാലസാഹെബ് എന്ന പേരിലറിയപ്പെടും. ഒരു പാര്‍ട്ടിയിലും ലയിക്കുകയില്ല’ വിതമ എംഎല്‍എയും അവരുടെ വക്താവായി തെരഞ്ഞെടുക്കപ്പെടുകയും ചെയ്ത ദീപക് കേസര്‍ക്കര്‍ പറഞ്ഞു. ഇന്ന് വൈകീട്ട് മാധ്യമങ്ങളെ കാണുമെന്നും അറിയിച്ചിട്ടുണ്ട്.
ഉദ്ധവ് താക്കറെയുടെ നേതൃത്വത്തില്‍ വിമതരെ അയോഗ്യരാക്കാന്‍ ഉദ്ധവ് താ്കറെ സ്പിക്കര്‍ക്ക് കത്ത് നല്‍കിയിരിക്കുകയാണ്. ആവശ്യം ഡെപ്യൂട്ടി സ്പീക്കര്‍ നര്‍ഹരി സിര്‍വാളിലിന്റെ പരിഗണനയിലാണ്. നടപടികളുമായി മുന്നോട്ട് പോകുന്നതിനിടെയാണ് ഷിന്‍ഡേ സംഘം പുതിയ പേര് പ്രഖ്യാപിച്ചിരിക്കുന്നത്.
വിമതര്‍ നിയമനടപടികള്‍ അവസാനിക്കുന്നത് വരെ ഗുവാഹട്ടിയിലെ റാഡിസണ്‍ ബ്ലൂ ഹോട്ടലില്‍ തന്നെ തുടരുമെന്നാണ് സൂചന. 16 എംഎല്‍എമാരെ അയോഗ്യരാക്കണമെന്നാണ് ഉദ്ധവ് ആവശ്യപ്പെട്ടിരിക്കുന്നത്.
ഇതിനിടെ ശിവസേനയുടെ നിര്‍ണായക ദേശീയ എക്സിക്യുട്ടീവ് യോഗം മുംബൈയില്‍ ആരംഭിച്ചു. യോഗം നടക്കുന്ന മുംബൈയിലെ ശിവസേന ഭവന് മുന്നില്‍ പ്രവര്‍ത്തകര്‍ തടിച്ചുകൂടിയിട്ടുണ്ട്. ഉദ്ധവ് താക്കറെയടക്കമുള്ള നേതാക്കള്‍ ഇങ്ങോട്ടേക്കെത്തിയിട്ടുണ്ട്. അതേസമയം മുംബൈയില്‍ പോലീസ് നിരോധനാജ്ഞ പ്രഖ്യാപിച്ചു. വിമത എംഎല്‍എമാരുടെ വസതികള്‍ക്കും ഓഫീസുകള്‍ക്കും നേരെ ശിവസേന പ്രവര്‍ത്തകരുടെ ആക്രമണം നടന്നുവരുന്ന പശ്ചാത്തലത്തിലാണ് നിരോധനാജ്ഞ പ്രഖ്യാപിച്ചിരിക്കുന്നത്. തുടര്‍ന്ന് രാഷ്‌ട്രീയ നേതാക്കള്‍, മന്ത്രിമാര്‍, എംഎല്‍എമാര്‍ മറ്റു ജനപ്രതിനിധികള്‍ എന്നിവര്‍ക്ക് സുരക്ഷ വര്‍ധിപ്പിക്കാനും പോലീസ് ഉത്തരവിറക്കിയിട്ടുണ്ട്.
വിമത നീക്കത്തെ തുടര്‍ന്നുള്ള പ്രതികാര നടപടിയായി കുടുംബാംഗങ്ങള്‍ക്കുള്ള സുരക്ഷ സംസ്ഥാന സര്‍ക്കാര്‍ പിന്‍വലിച്ചെന്ന് സര്‍ക്കാരിനെതിരെ ഷിന്‍ഡേ വിമര്‍ശനം ഉന്നയിച്ചിരുന്നു. എന്നാല്‍ അത്തരമൊരു തീരുമാനം സര്‍ക്കാര്‍ എടുത്തിട്ടില്ലെന്നും ആരോപണം വ്യാജമെന്നും ആഭ്യന്തര മന്ത്രി ദിലീപ് വല്‍സേ പാട്ടീല്‍ പറഞ്ഞു.
