ന്യൂദല്ഹി: ഇന്ത്യ ദക്ഷിണാഫ്രിക്ക ട്വന്റി20 മത്സരത്തിനിടെ ഗാലറിയില് കയ്യാങ്കളിയില് ഏര്പ്പെട്ട് ആരാധകര്. അരുണ് ജെയിറ്റ്ലി സ്റ്റേഡിയത്തിലാണ് സംഭവം. ഇതിന്റെ വീഡിയോയും സമൂഹമാധ്യമങ്ങളില് വൈറലായി. സംഘര്ഷം ഉണ്ടാകാനുള്ള കാരണം വ്യക്തമല്ല.
സ്റ്റേഡിയത്തിന്റെ മൂലയില് നടന്ന ‘പൊരിഞ്ഞ അടിയുടെ’ വിഡിയോ ഒരു ആരാധകന് റെക്കോര്ഡു ചെയ്യുകയും സമൂഹ മാധ്യമങ്ങളില് പങ്കുവയ്ക്കുകയും ചെയ്തതോടെയാണു സംഭവം പുറത്തറിയുന്നത്.മത്സരത്തിനിടെ നടന്ന കയ്യാങ്കളിയുടെ ദൃശ്യങ്ങള് ഗുസ്തി മത്സരം ഓര്മിപ്പിക്കുന്നെന്നും കാണാന് നല്ല രസമുണ്ടെന്നും ഒരു വിഭാഗം ആരാധകര് അഭിപ്രായപ്പെട്ടപ്പോള് കാണികളുടെ സുരക്ഷയ്ക്കു പോലും ഭീഷണി ഉയര്ത്തുന്ന രീതിയിലുള്ള ഇത്തരം സംഘര്ഷത്തെ ശക്തമായി അപലപിച്ച് മറ്റൊരു വിഭാഗം ആളുകള് രംഗത്തെത്തി. അടിയുടെ ഇടയില് പോലീസ് എത്തി രംഗം ശാന്തമാക്കുന്നതും വീഡിയോയില് കാണാം.
