പാലാ: പോലീസിന് മുമ്പില് നാളെ ചോദ്യം ചെയ്യലിന് ഹാജരാകില്ലെന്ന് മുന് എംഎല്എ പിസി ജോര്ജ്. ആരോഗ്യപ്രശ്നങ്ങളുണ്ടെന്ന് അദേഹം ഫോര്ട്ട് പോലീസിനെ അറിയിച്ചു. ചോദ്യംചെയ്യല് മറ്റൊരു ദിവസത്തേക്ക് മാറ്റിവയ്ക്കണമെന്നും പിസി ആവശ്യപ്പെട്ടിട്ടുണ്ട്. തൃക്കാക്കരയില് ബിജെപി സ്ഥാനാര്ത്ഥി എഎന് രാധാകൃഷ്ണന് വേണ്ടി അദേഹം പ്രചരണത്തിനെത്തും. നാളെ രാവിലെ ആറിന് അദേഹം ഈരാറ്റുപേട്ടയില് നിന്നും കൊച്ചിയിലേക്ക് തിരിക്കും. തുടര്ന്ന് ആറിലധികം വേദികളില് അദേഹം സംസാരിക്കുകയും കൊട്ടിക്കലാശത്തില് പങ്കെടുക്കുകയും ചെയ്യും.
ചോദ്യം ചെയ്യലിന് നാളെ ഫോര്ട്ട് പോലീസ് സ്റ്റേഷനില് ഹാജരാകണമെന്നാണ് നേരത്തെ പിസിയ്ക്ക് ലഭിച്ച നിര്ദ്ദേശം. പിസി ജോര്ജ് ബിജെപി പ്രചാരണത്തിനായി തൃക്കാക്കരയിലെത്താതിരിക്കാനാണ് പോലീസ് നോട്ടീസ് കൈമാറിയത്. തന്നെ കുടുക്കാന് ശ്രമിച്ച മുഖ്യമന്ത്രിക്ക് നാളെ തൃക്കാക്കരയില് മറുപടി നല്കുമെന്നും അദ്ദേഹം പറഞ്ഞിരുന്നു. തൃക്കാക്കരയില് രാഷ്ട്രീയ പ്രവര്ത്തകന്റെ പരിമിതിയില് നിന്ന് പറയാനുള്ളത് പറയുമെന്നും അദ്ദേഹം പറഞ്ഞിരുന്നു.
