കൊച്ചി: അതിജീവിതയുടെ ഹര്ജി പരിഗണിക്കുന്നതില് നിന്ന് ജഡ്ജി ജസ്റ്റിസ് കൗസര് എടപ്പഗത്ത് പിന്മാറി. ഇന്ന് രാവിലെ കോടതി നടപടികള് ആരംഭിച്ചതിന് പിന്നാലെ കേസ് പരിഗണിക്കുന്നതില് നിന്ന് പിന്മാറണമെന്ന് അഭിഭാഷകയായ അഡ്വ. പി.വി മിനി മുഖേനെ നടി ആവശ്യപ്പെട്ടിരുന്നു. ഉടന് തന്നെ ഹര്ജി കേള്ക്കുന്നതില് നിന്ന് പിന്മാറുകയാണെന്ന് ജസ്റ്റിസ് അറിയിച്ചു. ഇനി മറ്റൊരു ബെഞ്ച് ഈ കേസ് പരിഗണിക്കും. ഏത് ബെഞ്ചിലേക്ക് ഹര്ജി മാറ്റണമെന്നത് ഇനി ചീഫ് ജസ്റ്റിസ് ആവും തീരുമാനിക്കുക.
കൗസര് എടപ്പഗത്ത് തന്റെ ഹര്ജി പരിഗണിക്കുന്നതിനെതിരെ കഴിഞ്ഞ ദിവസം അതിജീവിത ഹൈക്കോടതിയില് അതൃപ്തി അറിയിച്ചിരുന്നു. ഇതേത്തുടര്ന്ന് ജസ്റ്റിസ് കൗസര് എടപ്പഗത്തിന് എങ്ങനെ ഈ ഹര്ജി കൈമാറും എന്നതില് ആശയക്കുഴപ്പം നിലനിന്നിരുന്നു. ഉന്നത സ്വാധീനം ഉപയോഗിച്ച് നടിയെ ആക്രമിച്ച കേസ് അട്ടിമറിക്കാന് ശ്രമിക്കുന്നുവെന്നാരോപിച്ചാണ് അതിജീവിത ഹൈക്കോടതിയില് ഹര്ജി നല്കിയത്. രാഷ്ട്രീയ സമ്മര്ദ്ദത്തിന്റെ പേരില് കേസ് അവസാനിപ്പിക്കാനാണ് അന്വേഷണ സംഘം ശ്രമിക്കുന്നതെന്ന് ഇവര് ആരോപിച്ചിരുന്നു. ഭരണമുന്നണിയിലെ ഉന്നതരുമായി ദിലീപിന് അവിശുദ്ധ ബന്ധം ഉണ്ടെന്നും ഹര്ജിയില് പറയുന്നു.
